ახლა პიცის მომზადება საკმაოდ გვიანია, ამიტომ ხვალისთვის გადაინახეთ ეს რეცეპტი და საერთოდ, პიცა კარგია სასაუზმედ ან სავახშმოდ. ამჯერად, მარხვის შემდეგ, ხორცეულის ცოტა შემსუბუქების პერიოდში, პიცა ქათმის ხორცით მოვამზადოთ.

შემადგენლობა:

• პიცის სოუსი - გემოვნებით
• ქათმის ფილე - 1 ცალი
• ლიმონი - 1 ცალი
• ყვითელი ბულგარული წიწაკა - 2 ცალი
• წითელი ხახვი - 1 თავი
• ყველი - 200 გრ.
• მაიონეზი - 150 გრ.
• ქინძი – გასაფორმებლად

ცომისთვის:

• ფქვილი - 500 გრ.
• მარგარინი - 150 გრ.
• მაწონი - 250 მლ.
• სოდა - 1/2 ჩ.კ.
• მარილი - 1 მწიკვი

პიცის სოუსისთვის:

• პომიდვრის სოუსი - 400 გრ.
• ტომატი - 170 გრ.
• დაფქული ორეგანო - 1 ს.კ.
• დაქუცმაცებული ნიორი - 1/2 ჩ.კ.
• დაფქული წიწაკა - 1 ჩ.კ

მომზადება:

      მოზილეთ ცომი: ხელით შეაზილეთ ერთმანეთს დარბილებული მარგარინი და ფქვილი. დაუმატეთ მაწონში გახსნილი სოდა და კარგად მოზილეთ (ცომი უნდა გამოვიდეს მაგარი).

      პიცის სოუსი: მოათავსეთ სოუსის ინგრედიენტები თასში და კარგად აურიეთ.

      ქათმის ფილე დაჭერით თხელ ნაჭრებად, მოასხეთ ლიმონის წვენი და გააჩერეთ ასე 30 წუთი.

      გააბრტყელეთ ცომი წრის ფორმაზე, წაუსვით პიცის სოუსი და დააწყეთ ინგრედიენტები შემდეგი მიმდევრობით: ქათმის ფილე, ალყა-ალყა დაჭრილი ხახვი, წვრილად დაჭრილი ბულგარული წიწაკა, მოაყარეთ გახეხილი ყველი, მოასხით მაიონეზი და მოვათავსოთ ღუმელში გამოსაცხობად.

      მზა პიცა გააფორმეთ წვრილად დაჭრილი ქინძით.

გემრიელად მიირთვით