ბაქლავა აჭარული ტკბილეულის უდავო ლიდერია. აჭარლებს იგი თავისი საკონდიტრო კულტურის საკუთრებად მიაჩნიათ, თუმცა არც იმ ფაქტს მალავენ, რომ იგი საქართველოში თურქეთიდან შემოვიდა და მისი პოპულარობაც აჭარაზე ოსმალეთის იმპერიის გავლენამ განაპირობა. დროთა განმავლობაში ბაქლავის სხვადასხვა, შედარებით მარტივი რეცეპტით მომზადებული ვარიანტებიც გავრცელდა. ჩეხური, ბაქოური, სომხური და სხვა სახელწოდებებით. ამჯერად კი Qwellynaria-ს რეცეპტს გთავაზობთ.

შემადგენლობა:

ცომი:

1. ფქვილი 1კგ.
2. კვერცხი 1ც.
3. კარაქი 100გრ.
4. შაქარი 1 ჩ/კ.
5. მარილი 1 ჩ/კ.

სიროფი:

1. შაქარი 1 ჭიქა

შიგთავსი:

1. ნიგოზი 1,5 ჭიქა
2. შაქარი 1 ჭიქა.
3. კარაქი 200გრ.

მომზადება:

შიგთავსი:

• ნიგოზი გაათეთრეთ მშრალ ტაფაზე (განუწყვეტლივ ურიეთ) 3-4 წუთი, შემდეგ ხელით მოაშორეთ ყავისფერი კანი, დააქუცმაცეთ ბლენდერში (ან ხორცსაკეპმანქანაში გაატარეთ) და აურიეთ შაქარში.

შაქრის სიროფი:

• 1 ჭიქა წყალს დაამატეთ შაქარი და ადუღეთ დაბალ ტემპერატურაზე 3–4 წუთი.

ცომი:

• 3 ჭიქა თბილ წყალს დაამატეთ გამდნარი კარაქი, კვერცხი, შაქარი, მარილი, ფქვილი და ზილეთ თბილ ადგილას დაახლოებით 20 წუთი.
• როდესაც ცომს გაჭრით ნასვრეტები უნდა ეტყობოდეს და ამ შემთხვევაში არის ცომი მზად.
• გაააბრტყელეთ ფქვილიან ზედაპირზე კალბასისებურად და დაჭერით ქათმის კვერცხის ზომის ნაჭრებად. უნდა გამოვიდეს დაახლოებით 40 ნაჭერი (1 ნაჭერი უნდა გააკეთოთ დანარჩენებზე ცოტათი დიდი).
• ცომის ნაჭრები უნდა გააბრტყელოთ ძალიან თხლად, თუნუქის ფორმაზე წაუსვით გამდნარი კარაქი და დააფინეთ პირველი ფენა (ფენები რიგ-რიგობით უნდა გააბრტყელოთ, ანუ როდესაც ერთ ფენას გააბრტყელებთ წაუსვით კარაქი, შემდეგ გააბრტყელეთ მეორე ფენა და ესე გაიმეორეთ ცომის დასრულებამდე, ცომი გაწელვისას თუ გაგეხათ, არაუშავს, ამით არაფერი შავდება), წაუსვით კარაქი დააფინეთ მეორე ფენა წაუსვით კარაქი, ასე გაიმეორეთ რამოდენიმეჯერ, ათი ცხიმიანი ფენის მერე მოაყარეთ ნიგვზისა და შაქრის ნარევი და გააგრძელეთ ფენების იგივე თანმიმდევრობით დაწყობა (ყოველ მეათე ცხიმწასმულ ცომზე აყრით ნიგვზისა და შაქრის ნარევს, გამოდის ნიგვზის სამჯერ მოყრა, ბოლო მეათე ცხიმწასმულ ცომზე არ აყრით ნიგოზს).
• ბოლო ფენას გადააფარეთ ცომის დიდი ნაწილი, გადაუკეცეთ გვერდები, წაუსვით ცხიმი, დაჭერით სასურველი ზომის ნაჭრებად, შედგთ 200–220* ტემპერატურაზე გაცხელებულ აირღუმელში, 10 წუთის შემდეგ ტემპერატურას დაუკლით 160–170*–მდე. გამოცხობის შემდეგ, გამოიღეთ ბაქლავა აირღუმელიდან, გააცივეთ 30–40 წუთის განმავლობაში და მოასხით შაქრის სიროფი.
• როდესაც ბაქლავა სიროფით გაიჟღინთება მაშინ შეგიძლიათ გაიტანოთ სუფრაზე.