428 წელს, იერუსალიმიდან კონსტანტინოპოლში გადაასვენეს წმინდა სტეფანე პირველდიაკვნის, პირველმოწამის წმინდა ნაწილები.

      მას შემდეგ რაც მორმეტი მოციქული ქრისტე ეკლესიის თორემ სვეტად იქცა, უფლის სიტყვამ გავრცელება დაიწყო. მრავლდებოდნენ ეკლესიის მოწაფენი და მრავლდებოდა პირველი დრტვინვა ბერძენ ებრაელთა მხრიდან, "რამეთუ უგულებელს იქმნებოდეს მსახურება იგი დღითი დღე ქურივთა მათითაი."

      სწორედ მაშინ, თორმეტმა მოციქულმა აკურთხა შვიდი დიაკვანი მათთვის პასუხის გასაცემად და მსახურებად, რომელთა შორის იყო სტეფანე - "კაცი სავსე სარწმუნოებითა და სულითა წმინდითა". სტეფანეს ქადაგება, რწმენის ძალა და მის მიერ წარმოთქმული სული წმინდის სიტყვის სიძლიერე აშინებდათ იუდეველებს, ამიტომ დევნა წაუყეს, შეიპტრეს და ქვებით ჩაქოლეს, მისი წმიდა ცხედარი კი ღია ცის ქვეშ დააგდეს, ფრინველებისა და მხეცების საჯიჯგნად. საქმე მოციქულთა მოგვითხრობს:

"54. ხოლო მათ ვითარცა ესმოდა ესე, განიხერხებოდეს გულითა მათითა და იღრჭენდეს მის ზედა კბილთა მათთა. 55. ხოლო იგი სავსე იყო სულითა წმიდითა, ახედნა ცად და იხილა დიდებაჲ ღმრთისაჲ და იესუ, მდგომარე მარჯუენით ღმრთისა. 56. და თქუა: აჰა-ესერა ვხედავ ცათა განხუმულთა და ძესა კაცისასა, მარჯუენით ღმრთისა მდგომარესა. 57. ხოლო მათ ჴმითა მაღლითა ღაღად-ყვეს და ჴელნი ყურთა შეისხნეს და მიჰმართეს ერთბამად მის ზედა; 58. და განიყვანეს გარეშე ქალაქსა და ქვასა დაჰკრებდეს. და მკლველნი იგი დასდებდეს სამოსელსა მათსა ფერჴთა თანა ჭაბუკისა ვისთამე, რომელსა სახელი ერქუა სავლე. 59. და ქვასა დაჰკრებდეს სტეფანეს. ხოლო იგი ილოცვიდა და იტყოდა: უფალო იესუ ქრისტე, შეივედრე სული ჩემი. 60. დაიდგინა მუჴლნი და ჴმითა დიდითა თქუა: უფალო, ნუ შეურაცხ ამათ ცოდვასა ამას. და ესე ვითარცა თქუა, დაიძინა." (საქმ. 7.)

      მეორე ღამეს ცნობილმა იუდეველმა სჯულისმეცნიერმა, უკვე მაცხოვრის სარწმუნოებისკენ გადადრეკილმა გამალიელმა, რომელმაც მოციქულები დაიცვა სინედრიონზე (საქმე, 5.34-40), ერთგულ კაცებს გადაასვენებინა ნეტარის ნეშტი და თავის მამულში, იერუსალიმის მახლობლად, მღვიმეში დაფლა.

      ნიკოდიმოსის გარდაიცვალების შემდეგ, გამალიელმა იგი სტეფანეს საფლავის მახლობლად დაკრძალა. შემდგომში იქვე დაასაფლავეს თავად გამალიელიც ნათელღებულ ძესთან, აბიბოსთან ერთად.

      415 წელს მთავარეპისკოპოსმა იოანემ ეპისკოპოსებთან ელეფთერ სებასტიელთან და ელეფთერ იერიქონელთან ერთად სასწაულებრივ აღმოიყვანა წმიდანთა ნაწილები და საზეიმოდ გადაასვენა იერუსალიმში. ამ დროიდან მოყოლებული ამ სიწმიდეებთან მრავალი კურნება აღესრულებოდა.

      შემდგომში, კეთილმსახური მეფის, თეოდოსი უმცროსის (408-450) დროს, პირველმოწამე სტეფანეს ნაწილები იერუსალიმიდან კონსტანტინოპოლში გადასვენდა და წმიდა დიაკონ ლავრენტის სახელობის ტაძარში იქნა დაბრძანებული. როცა წმიდა სტეფანეს სახელობის ტაძარი აიგო, უხრწნელი ნაწილებიც აქ გადაასვენეს (2 აგვისტოს).

      წმინდა სტეფანე პირველმოწამის ხსენების დღედ დადგენილია 9 იანვარი.

◄ გუშინ | დღეს | ხვალ ►