უბიწო და ღმრთისათვის სათნო ქცევა ესაა: აქეთ-იქით თვალების ცეცებას მოერიდე და მუდამ წინ იყურე, ამაოსმეტყველებას გაექეცი და მხოლოდ ისა თქვი რაც აუცილებელია, უბრალო სამოსი იკმარე, უბრალო საზრდელი მიიღე, შიმშილის დასაოკებლად და არა გემოთმოყვარეობის დასაცხრობად. ყველაფერი ცოტ-ცოტა ჭამე, ერთს ნუ შეიძულებ და მეორეს ნუ შეიყვარებ, და რაც გიყვარს, იმით ნუ ამოიყორავ მუცელს. ყოველ სათნოებაზე მაღლა დგას განსჯის უნარი. ღვინოს კი, თუ მეგობრები არ გწვევიან, ან თუ ავად არა ხარ, ან ძალიან სუსტად თუ არა გრძნობ თავს, საერთოდ ნუ დალევ. კაცი რომ ლაპარაკობს, სიტყვას ნუ გააწყვეტინებ, და რაიმეს თუ გკითხავენ, უმეცარივით  ნუკი  უპასუხებ, ბრძენთა სიმტკიცეს მოუხმე. სადაც არ უნდა იყო, უმცირესად შერაცხე თავი და სხვა ძმათა მსახურად. ნურასოდეს გაიშიშვლებ სხეულის რომელიმე ნაწილს, ნურავის სხეულს ნუ შეეხები რაიმე აუცილებლობის გარეშე და ნურც ნურავის მისცემ ნებას, ასეთივე მიზეზის გარეშე შეგეხონ. სიკვდილივით ერიდე კადნიერ ლაპარაკს. ძილშიაც უბიწოება დაიმარხე, რათა მფარველი ანგელოზი არ განგეშოროს, და თუ ეს შესაძლებელია, ეცადე ვერავინ გნახოს მძინარე. კარგი იქნება, თუ ვერც შენს ნახველს დაინახავს ვინმე. თუ ტრაპეზზე მჯდომს ხველება აგიტყდა, თავი უკან მიაბრუნე და ისე დაახველე. სმა-ჭამაც მორიდებული შეგფერის, როგორც შვილს ღმრთისას.

       ხელს ნუ გაიწვდი იმის ასაღებად, რაც შენს მეგობარს შესთავაზეს. თუ შენთან ერთად ტრაპეზზე უცხო ზის, სთხოვე რაიმე იხმიოს, თან წესრიგი დაიცავი. წყნარად და მოკრძალებულად იჯექი, ნუ გაიშიშვლებ სხეულის  რომელიმე  ნაწილს. როდესაც ამთქნარებ, პირზე ხელი აიფარე, რომ სხვებმა ვერ დაინახონ, რამეთუ, თუ სუნთქვას შეიკავებ, მთქნარება გაგივლის. წინამძღვრის, მეგობრის ან მოწაფის სენაკში, რომ შედიხარ ეცადე ვერ დაინახო რა ნივთები აწყვია იქ. თუ გულისსიტყვა ამისკენ გაქეზებს, ნუ დაემორჩილები მას, რამეთუ ვინც ამ საქმეში მოურიდებელია, მისთვის უცხოა მონაზვნური სახე და თვით ქრისტე, ვინც ეს სახე მოგვანიჭა. თვალს ნუ მიაპყრობ შენი მეგობრის სენაკში იმ ადგილებს, სადაც ჭურჭელია შენახული. ჩუმად გააღე და დახურე შენი სენაკის კარიც, და შენი მეგობრის სენაკის კარიც.  გაუფრთხილებლად ნურავისთან შეხვალ, ჯერ დააკაკუნე, ნებართვა სთხოვე და მერე მორიდებულად შედი.

       მომაკვდინებელი შხამის  დალევა გერჩიოს, ქალთან ერთად ჭამას, თუნდაც ეს დედაშენი ან შენი და იყოს. გველთან ერთად ძილი გერჩიოს, ჭაბუკთან ერთად ერთ ჭერქვეშ ძილს ან წოლას, თუნდაც ის შენი ხორციელი ძმა იყოს. თუ გზად მიდიხარ და ვინმე უფროსთაგანი გეტყვის, მოდი, ვიგალობოთო, დაემორჩილე. ხოლო თუ არავინ არაფერს არ გეუბნება, მდუმარე იყავ და გულში ადიდე ღმერთი. ნურავის ნურაფერში ეწინააღმდეგები, ნუ ედავები, ტყუილს ნუ იტყვი, ნუ დაიფიცებ უფლის სახელს. არად გაგდებენ? სხვას ნუ უზამ იგივეს. გულს გტკენენ? შენ ნუ ატკენ გულს. სჯობს ხორცი დაიღუპოს, ოღონდ სული არ დაზიანდეს. ნურავის გამოუტან განაჩენს, ხოლო თუ უსამართლოდ განგსჯიან, მოითმინე. გულით ნუ შეიყვარებ  რაიმე ამსოფლიურს, დაემორჩილე წინამძღვრებსა და უფროსებს, მაგრამ მოერიდე მათთან სიახლოვეს, რამეთუ ესაა მახე, დახსნილ კაცთა დასაღუპად დაგებული.

       შენ, გემოთმოყვარე კაცო, სტომაქის ამოვსებას რომ ლამობ, გიჯობს ანთებული მუგუზალი გადაყლაპო, ვიდრე მთავართა და მმართველთა მიერ შემოძლეული ტკბილეული. ყველას მიაწვდინე შენი მოწყალება და ყველასგან მიიღე შეურაცხყოფა. უფრთხილდი მრავლისმეტყველებას, რამეთუ იგი ღმრთისაგან მოვლენილ ფიქრებს აქრობს შენს გულში. ცოფმორეული ლომივით ერიდე დოგმატებზე მსჯელობას, ამაზე ნურც ეკლესიის შვილებს ესაუბრები და ნურც უცხოებს. სათოფეზე ნუ გაეკარები მრისხანე და ანჩხლ ადამიანებს, რათა შენს გულშიც არ დაიბუდოს გაღიზიანებამ და შენი სული ხიბლის ტყვეობაში არ აღმოჩნდეს. ამაყ კაცთან ერთად ნუ იცხოვრებ, რათა სულიწმინდის ძალამ არ მიგატოვოს.