ანტიკურ სამყაროში, დღევანდელი თურქეთის ტერიტორიაზე არსებობდა სახელმწიფო ისავრია (კილიკიის მოსაზღვრედ). მისი ერთ-ერთი უდიდესი ქალაქი იყო ირინოპოლისი (იგივე ირინეპოლისი ან ირინოპოლი). სწორედ ამ ქალაქში დაიბადა წმინდა გრიგოლი. ჯერ კიდევ სიყრმის ასაკიდან შეიყვარა საეკლესიო მსახურება. როცა გრიგოლი წამოიზარდა, დედ-მამამ მისი დაქორწინება გადაწყვიტა, მაგრამ ნეტარმა ფარულად დატოვა მშობლიური სახლი და მოღვაწეობას სხვადასხვა ქალაქში, ხეტიალსა და უფლის სიტყვის ქადაგებას შეუდგა. მთელი სიცოცხლის მანძილზე მწირობდა - ხან კონსტანტინოპოლში იყო, ხან რომში, კორინთოში, თესალონიკში, რამდენიმე ხანს ოლიმპოს მთის ერთ გამოქვაბულშიც მოსაგრეობდა. ხოლო დეკაპოლელი, ისავრიის ათი ქალაქის გრებსითი სახელი იყო - სწორედ ამიტომ ეწოდა მას დეკაპოლელი ანუ ათქალაქელი. წმინდა გრიგოლს ასევე იცნობ სახელით - „ახალი სასწაულმოქმედი“. ღირსი გრიგოლი ყველგან ღვთის სიტყვას ქადაგებდა, ამხელდა ხატმბძროლთა მწვალებლობას და განამტკიცებდა მართლმორწმუნეებს, რომელთაც იმ დროს ერეტიკოსები დევნიდნენ, დაუცხრომელი ღვაწლისა და ლოცვისთვის ნეტარს წინასწარმეტყველებისა და სასწაულთქმედების ნიჭი მიემადლა. მან გულის ისეთი სიწმიდე მოიგო, რომ ღვთის ნებით, ღირსი შეიქნა წმიდა სამების სადიდებელი ანგელოზთა გალობა მოესმინა. ხატმბრძოლთა ერესს უფრო ქმედითად რომ აღდგომოდა წინ, ღირსი გრიგოლი კონსტანტინოპოლში ჩავიდა. დედაქალაქში წმიდანს მძიმე სნეულებამ ჯანი შეურყია და, ძალებგამოცლილმა, 816 წელს სული უფალს შეჰვედრა.

◄ გუშინ | დღეს | ხვალ ►