რომაელთა ჯარში, მრავალი ეროვნების მეომარი მსახურობდა, მათ შორის იყო წარმოშობით სკვითი მერკური. მესამე საუკუნის შუა წლებში, იმპერატორმა დეკიუსმა გამოსცა კანონი, რომელიც რომლის მოქალაქეებს ავალდებულებდა წარმართული ღვთაებების თაყვანისცემას. ბრძანების შეუსრულებლობის შემთხვევაში სიკვდილით სჯიდნენ. ამ დროს იმპერიას ბარბაროსები დაესხნენ თავს და დეკიუსმა ლაშქრი შეკრიბა მათთან საბრძოლველად. ერთ-ერთი ბრძოლის დროს წმიდა მერკურის უფლის ანგელოზი გამოეცხადა, მახვილი გაუწოდა და უთხრა: "ნუ გეშინია, მხნედ შეებრძოლე მტერს და როცა გაიმარჯვებ, არ დაივიწყო უფალი ღმერთი შენი". წმიდა მეომარმა ამ მახვილით გაბედულად გაიკაფა გზა მოწინააღმდეგის ურდოებს შორის, ბარბაროსთა მეფეც მოკლა და რომაელებს გამარჯვება მოუტანა. იმპერატორმა მადლიერების ნიშნად წმიდა მერკური უხვად დააჯილდოვა და მხედართუფროსად დანიშნა.დიდმოწამე მხედარს კვლავ გამოეცხადა უფლის ანგელოზი, შეახსენა, ვისგან ებოძა გამარჯვება, წინსვლა და ღვთის სამსახურისკენ მოუწოდა. მაშინ წმიდა მერკურის მოაგონდა, რომ მამამისი, გორდიანე, ქრისტიანულ სარწმუნოებას აღიარებდა და თავადაც მოინათლა. მან უარი განაცხადა საზეიმო წარმართულ მსხვერპლშეწირვაში მონაწილეობაზე, რისთვისაც მრისხანე იმპერატორმა თავისთან მოიხმო. მერკურიმ დაუფარავად აღიარა, რომ ქრისტიანი იყო, უღმრთო თვითმპყრობელს ფეხებთან მიუგდო მეომრის სარტყელი და მანტია და მიწიერ პატივზე უარი განაცხადა. ის დააპატიმრეს.

      საპყრობილეში დიდმოწამეს კვლავ გამოეცხადა ანგელოზი, განამტკიცა და მოუწოდა, ყოველგვარი სატანჯველი დაეთმინა ქრისტეს სახელისათვის.ნეტარი მარტვილი ცეცხლის ზემოთ გაჭიმეს, დანებით დასერეს და დაუნდობლად სცემეს. რამდენჯერაც ასე სასტიკად ნაწამები წმიდანი საპყრობილეში ჩააგდეს, იმდენჯერ სასწაულებრივი კურნება მიემადლა უფლისგან, რაც ქრისტეს სარწმუნოების უძლეველობას უმტკიცებდა უსჯულოებს. სიკვდილმისჯილ მერკურის თავად უფალი გამოეცხადა და აღუთქვა, რომ მალე დაიხსნიდა სატანჯველთაგან. დიდმოწამეს კაბადოკიის კესარიაში მოჰკვეთეს თავი. მისი პატიოსანი ცხედარი მირონისა და საკმევლის სურნელს აფრქვევდა და მრავალ სნეულს კურნავდა.

      ქრისტეს ეკლესიას წმინდა მარკური, გარდაცვალების შემდეგაც იცავდა: მღვდელთმთავარი ბასილი დიდი მხურვალედ ევედრებოდა ყოვლადწმინდა ღმრთისმშობელს ურჯულო იმპერატორისგან (იულიანე განდგომილი) მართლმორწმუნეთა დახსნას. ზეციურმა დედოფალმა შეისმინა მისი ვედრება და მედღესასწაულე ეკლესიიდან წმიდა მხედარი მერკური გამოგზავნა მებრძოლი ეკლესიის დასაცავად: ხატზე ყოვლადწმიდა მარიამის გვერდით აღბეჭდილი დიდმოწამის გამოსახულება გაქრა, შემდეგ კი კვლავ გამოჩნდა გასისხლიანებული მახვილით ხელში. სწორედ ამ დროს სპარსელებთან ომში იულიანე განდგომილი სასიკვდილოდ დაჭრა უცნობმა მეომარმა, რომელიც იმავ წამს გაუჩინარდა. სულთმობრძავი ღვთისმგმობელის უკანასკნელი სიტყვები იყო: "შენ გაიმარჯვე, გალილეველო!"

◄ გუშინ | დღეს | ხვალ ►