წმინდა დედოფლის მშობლები დიდგვაროვნები იყვნენ, მათ დიდხანს არ ეძლეოდათ შვილი და დედა ღვთისმშობელს მხურვალედ ევედრებოდნენ შემწეობას. ბოლოს მათ შეეძინათ ასული, რომელსაც თეოფანია დაარქვეს, რაც ღმერთშემოსილს ნიშნავს.

      იმპერატორმა ბასილი მაკედონელმა თეოფანია გულისხმიერებისა და ღვთისმოშიშობით გამოარჩია თავისი მემკვიდრის - ლეონის მეუღლედ გამოარჩია. ჯვრისწერის შემდეგ ბოროტმა ენებმა ბასილის ამცნეს, რომ ლეონი მის მოკვლას და ტახტის ხელში ჩაგდებას აპირებდა. მეფე ერწმუნა ცილისმწამებლებს და თავისი ძე მეუღლითურთ დაუყოვნებლივ საპყრობილეში ჩააგდო. ლეონი და თეოფანია სამ წელიწადზე მეტ ხანს იტანჯებოდნენ პყრობილებაში, მაგრამ, უფლის გულმოწყალებას მინდობილნი, მთელ დღეებს მარხვასა და ლოცვაში ატარებდნენ. ამასობაში განრისხებული იმპერატორიც დაცხრა, მიხვდა თავის შეცდომას და ტუსაღები გაათავისუფლა.

      იმპერატორ ბასილის გარდაცვალების შემდეგ ტახტზე ლეონი ავიდა, ნეტარ დედოფალს არ ხიბლავდა ამსოფლიური დიდება და პატივი: კვლავინდებურად ლოცულობდა, ჭამდა მხოლოდ პურსა და გამხმარ მწვანილს, მდიდრული სადედოფლო შესამოსლის ქვეშ მჩხვლეტავი ჯვალო ემოსა, ეძინა უხეშ საწოლზე, რომლის ქვეშაც ცხოველების ბასრ ძვლებს ყრიდა. მთელ თავის ქონებასა და ძვირფასეულობას წმიდა თეოფანია ქვრივებს, ობლებსა და გლახაკებს ურიგებდა, მონა-მხევლებს ისე ეპყრობოდა, როგორც ქრისტესმიერ საყვარელ და-ძმებს.

      ლეონ ბრძენი თაყვანს სცემდა მას არა მარტო როგორც ცოლსა და დედოფალს, არამედ როგორც თავის მეოხს უფლის წინაშე.წმიდა დედოფალმა მძიმე ავადმყოფობის შემდეგ მშვიდობით შეჰვედრა სული უფალს.

◄ გუშინ | დღეს | ხვალ ►