გორის ყველა სტუმარი, ქართველი თუ უცხოელი ტურისტი მიისწრაფვის სტალინის სახლ-მუზეუმისკენ. რა თქმა უნდა, იქ სანახვი მართლაც ბევრია, იქნება ეს "დიდი ბელადის" მემორიალური სახლი თუ ნივთები, ვაგონი თუ სხვადასხვა ქვეყნიდან ძღვნად მორთმეული საჩუქრები. მაგრამ ცოტამ თუ იცის გორში ისტორიულ-ეთნოგრაფიული მუზეუმის არსებობის შესახებ, არადა ეს უკანასკნელი სტალინის სახლ-მუზეუმამდე რამდენიმე წლით ადრე გაიხსნა.

      1935 წელს, ქალაქ გორში, ისტორიულ-ეთნოგრაფიული, შემდგომში ქართველი ეთნოგრაფის, ისტორიის მეცნიერებათა დოქტორის და პროფესორის სერგი მაკალათიას სახელობის მუზეუმი გაიხსნა.

      ჩვენს წ. აღ.-მდე, IV-III ათასწლეულების არქეოლოგიური მასალა, მათ შორის ნუმიზმატიკის ნიმუშები, XVII–XIX სს-ის საბრძოლო იარაღის კოლექცია, XVIII-XIX სს-ის ეთნოგრაფიული მასალა: ქართული და ყარაბაღული ფარდაგები, ოქრომკედით ნაქარგი საეკლესიო დანიშნულების სამოსელი, ხალიჩები და ქირმანშალები - ყველაფერი ეს წარმოდგენილია სერგი მაკალათიას სახელობის ისტორიულ-ეთნოგრაფიულ მუზეუმში.

      სოფელ არბოში და სოფელ ძევერაში, მუზეუმს ფილიალებიც აქვს, შესაბამისად ნიკო ლომოურის სახლ-მუზეუმი და ალექსანდრე ჯავახიშვილის სახლ-მუზეუმი.

      მუზეუმი მუშაობს ყოველდღე, კვირისა და ორშაბათის გარდა. მუშაობს 9:30 სთ-დან 17:30 სთ-მდე.