თავი I

1,1 ხილვაჲ აბდიასი, რომელი იყო უწინარეს გამოსლვისა ასურასტანით. ამათ იტყჳს უფალი ღმერთი იდუმეასა: სასმენელი მესმა უფლისა მიერ და გარე-მოცვა წარმართთა მიმართ განავლინა. აღდეგით და აღვდგეთ მის ზედა ბრძოლად!
1,2 აჰა შემცირებულად მიგეც შენ წარმართთა შორის. უპატივო ხარ შენ ფრიად.
1,3 ამპარტავანებამან გულისა შენისამან აღგიღო შენ დამკჳდრებულთა შორის ჴურელებსა კლდეთასა. აღმამაღლებელი საყოფლისა თჳსისა მეტყჱლი გულსა შინა მისსა: ვინ დამამჴუას მე ქუჱყანასა ზედა?
1,4 უკეთუ აღიმაღლო, ვითარცა არწივმან, და უკეთუ შორის ვარსკლავთა დაიდგა ბუდე შენი, მიერ გარდამოგაგდო შენ - იტყჳს უფალი.
1,5 უკეთუმცა მპარავნი შევიდეს შენდა ანუ ავაზაკნი ღამე, სადამცა განიგდე? არამცა იპარნე საკმანი თავთა თჳსთათჳს და უკეთუმცა მსთულებელნი შევიდეს შენდა, არამცა დაუტევესა მოსაკუფხლავი?
1,6 ვითარ გამოკულეულ იქმნა ესავ და დაშთეს დაფარულნი მისნჲ
1,7 ვიდრე საზღუართამდე შენთა განგავლინეს შენ, ყოველნი მამაკაცნი აღთქმისა შენისანი წინა-აღგიდგეს შენ, ძლიერ იქმნეს (sic) შენდამი მამაკაცნი მშჳდობისა შენისანი, დაგიდვეს შესაბრკოლებელი ქუჱშე შენსა. არა არს გულისხმის-ყოფაჲ მათ თანა.
1,8 მას დღესა შინა - იტყჳს უფალი - წარვსწყმიდნე ბრძენნი ქუჱყანით იდუმეაჲთ და გულისჴმის-ყოფაჲ მთისაგან ისავისსა.
1,9 და წიწნეულ იქმნენ (sic) მბრძოლნი შენნი თემანით გამონი, რაჲთა აღიღოს კაცი მთისაგან ესავისსა.(!)
1,10 კლვისათჳს და უთნოობისა ძმისა შენისა იაკობისსა(!) და დაგფაროს შენ სირცხჳლმან და აღგჴოცო უკუნისამდე.
1,11 ვინა დღითგან წინა-აღუდეგ წინა-აღმდგომად დღესა შინა ტყუჱ-ყოფადისასა სხუა ნათესავნი ძალსა მისსა და უცხონი შევიდეს ბჭეთა მისთა და იჱრუსალიმსა ზედა განიგდეს წილი. და თქუჱნ ხართ, ვითარცა ერთი მათგანი.
1,12 და ნუ მიხედავ დღესა უცხოსა დღესა შინა ძისა შენისასა და ნუ მოსცხრები ძეთა ზედა იუდასთა დღესა შინა წარწყმედისა მათისასა და ნუ დიდსიტყუაობ დღესა შინა ჭირისასა.
1,13 ნუცა შეხუალ ბჭეთა ერისათა დღესა შინა ტკივილთა მათთასა და ნუ ზედ-დაჰხედავ შენცა შესაკრებელსა მათსა დღესა შინა მოსრულებისა მათისასა და ნუცა თან-დაშჯდები ძალსა ზედა მათსა დღესა შინა წარწყმედისა მათისასა.
1,14 ნუცა დასდგები განსავალთა ზედა მათთა *მოწყუჱდად განრინებულთა მათგანთა, ნუ წყუდეულ-ჰყოფ მლტოლვარეთა მათგან დღესა შინა ჭირისასა.
1,15 მით რამეთუ ახლოს არს დღე უფლისაჲ ყოველთა ზედა ნათესავთა; ვითარ-სახედ უყავ, ეგრეთ იყოს შენდა. მოსაგებელი შენი მოგეგოს შენ თავსა ზედა შენსა.
1,16 მით რამეთუ ვითარ-სახედ ჰსუჱმდ მთასა ზედა წმიდასა ჩემსა, სუმიდენ ყოველნი ნათესავნი ღჳნოსა. სუმიდენ და შთაჰსთქმიდენ. და იყვნენ ვითარცა არაყოფილნი.
1,17 ხოლო შორის მთასა სიონსა იყოს მაცხოვარებაჲ და იყოს წმიდა. და დაიმკჳდრნეს სახლმან იაკობისმან დამმკჳდრებელნი მათნი.
1,18 და იყოს სახლი იაკობისი ცეცხლ, და სახლი იოსებისი - ალ, ხოლო ისავისი - ლელწამ, და აღატყდენ მათ ზედა და შეჭამნენ იგინი და არა იყოს მეცეცხლე სახლსა ისავისსა, რამეთუ უფალმან თქუა.
1,19 და დაიმკჳდრონ ნაგების შინათა მთაჲ ისავისი, და სეფილას შინათა - უცხოტომნი იგი. და დაიმკჳდრონ მთაჲ იგი ეფრემისი და ველი სამარიაჲსაჲ და ბენიამენი და გალაადი.
1,20 და გარდასახლებისა დასაბამ ესე არს ძეთა ისრაჱლისათა ქუეყანაჲ ქანანელთაჲ ვიდრე სარეფთონდმდე და გარდასახლებაჲ იჱრუსალიმისაჲ ვიდრე ფარათადმდე და დაიმკჳდრნენ ქალაქნი ნაგებისნი.
1,21 და აღვიდოდინ განრინებულნი მთისაგან სიონისა შურის-ძიებად მთასა ისავისსა და იყოს უფლისა მეფობა.