ზოგადი ცნობები წინასწარმეტყველ დანიელის შესახებ

       სახელი დანიელი ნიშნავს ღმერთია ჩემი მსაჯული. იგი ტყვედ წაიყვანეს ბაბილონში მეფე იოაკიმეს მმართველობის მე-3 წელს . წინასწარმეტყველი ბაბილონის სამეფო სასახლეში იზრდებოდა და თანამედროვეობის ერთ-ერთი უდიდესი სწავლული გახდა.
        ძველი და ახალი აღთქმის ეკლესია ერთხმად აღიარებს წიგნის ავტორად წინასწარმეტყველ დანიელს. იოსებ ფლავიუსი მის შესახებ შენიშნავს: დანიელმა მიუხედავად გარდაცვალებისა მარადიული ხსოვნა დატოვა, რადგან მის მიერ დაწერილი წიგნები დღემდე იკითხება ჩვენში და ჩვენ ვრწმუნდებით, რომ იგი ღმერთს ესაუბრებოდა და აღწერა რა ყოველივე ეს, ამით დადასტურდა ჩვენ წინაშე მისი სიტყვების ჭეშმაერიტება.
ახალ აღთქმაში ერთგან მაცხოვარი ამბობს: „ამრიგად, როცა იხილავთ გატიალების სიბილწეს, წმინდა ადგილზე მდგომს, წინასწარმეტყველმა დანიელმა რომ თქვა..." ამ სიტყვებით მაცხოვარი არა მარტო დანიელის როგორც ისტორიული პირის არსებობას ადასტურებს, არამედ მის სახელთან დაკავშირებული წიგნის ჭეშმარიტრებასაც.
       წიგნის ავტორი საკუთარ თავს ბაბილონის ტყვეობის თანამედროვედ წარმოგვიდგენს. მასში ამ ეპოქის კვალი ნათლადაა აღბეჭდილი, რაც უპირველეს ყოვლისა ენის თავისებურებაში მჟღავნდება. წიგნი პირველი თავიდან მეორე თავის სამი მუხლის ჩათვლით და მერვე თავიდან ბოლომდე (მეთორმეტე თავის ჩათვლით) ებრაულ ენაზეა დაწერილი, ხოლო შუალედი ნაწილი არამეულად . ავტორი, ვითარცა იუდეველი, ბრწყინვალედ ფლობს მშობლიურ ენას, ხოლო ბაბილონში ცხოვრების შედეგად ამგვარივე ხარისხით განისწავლება იმპერიაში სყოველთაოდ მიჩნეულ არამეულში. მითითებულ ენებზე წიგნი შემდეგი მიზეზით იწერება: ებრაულ ენაზე დაიწერა ის ნაწილი, სადაც მოვლენები საკუთრივ დანიელისა და იუდეველი ერის შესახებაა გადმოცემული, ხოლო არამეულენოვანი მონაკვეთი წარმართი ერების თაობაზე გვამცნობს წინასწარმეტყველებას. შესაბამისად, წარმართთათვის განკუთვნილი მოძღვრება ამ ადამიანთა მშობლიურ ენაზე იწერება. დანიელის წიგნში გადმოცემული ყველა ფაქტი მოგვიანებით აღმოჩენილი ისტორიული წყაროებითაც დასტურდება, რაც კიდევ ერთხელ აჭეშმარიტებს მის უტყუარობას.

       დანიელის წიგნის შემადგენლობა და მასში გადმოცემული მოვლენები
დანიელის წიგნი შემადგენლობის მიხედვით ორ ნაწილად იყოფა: ისტორიული (1-6 თავები) და საწინასწარმეტველო (7-12 თავები). პირველ ნაწილში აღწერილია წინასწარმეტყველის ცხოვრება და მისი თანამედროვე მოვლენები ბაბილონისა და მიდო-სპარსეთის სამეფოებში, რაშიც თავად დანიელი და მისი მეგობრები უშუალოდ მონაწილეობდნენ. წიგნის მეორე ნაწილში გადმოცემულია დანიელის ხილვები და წინასწარმეტყველებები იუდეისა და იმ წარმართი ერების შესახებ, რომელბმაც ღვთის რჩეული ხალხის ცხოვრებაზე გარკვეული ზეგავლენა იქონიეს. წიგნის ორივე ნაწილში წარმოდგენილია სწავლება კაცის ძისა და ღვთის სასუფევლის შესახებ.

♦ დანიელ წინასწარმეტყველი ♦