ზოგადი ცნობები ზაქარია წინასწარმეტყველის შესახებ

       წინასწარმეტყველი ზაქარია წიგნის დასაწყისში საკუთარი წინაპრების შესახებ გვაუწყებს . სხვა გენეოლოგიური მითითებების გათვალისწინებით შეიძლება დავასკვნათ, რომ ბერექია ზაქარიას მამაა, ხოლო ყიდო ბაბუა. თუმცა ეს საკითხი ეკლესიის მამათა მიერ განსხვავებულად განიმარტება.
წმ. კირილე ალექსანდრიელის თანახმად, ზაქარია ხორციელად ბერექიასგან იშვა, მაგრამ ამავდროულად სულიერად ყიდო წინასწამრტყველის ძეა, რომელმაც იგი აღზარდა და ზაქარია ყოველგვარ კეთილმოქმედებაში სწორედ მას ჰბაძავდა.
       ერთ-ერთი გვიანდელი ეპოქის განნმარტებელი ამ საკითხის კომენტირებისას ლევირატის წესზე მიუთითებს. მისი თქმით, წინასწარმეტყველის დედა მეუღლის ბერექიას გარდაცვალების შემდეგ მისი ძმისგან ყიდოსგან შობს ძეს ზაქარიას. ამრიგად, ყიდო ზაქარიას ხორციელი მამაა, ხოლო ბერექიაც ასევე მამაა, მაგრამ რჯულისმიერი.
ნეტარი იერონიმე ყიდოს მეფეთა წიგნებში ნახსენებ პიროვნებასთან აიგივებს. შესაბამისად, ყიდო არათუ ზაქარიას ბაბუა, არამედ ერთ-ერთი შორეული წინაპარია. განმმარტბელთა ნაწილს მიაჩნია, რომ ზაქარია ლევიტელთა სამღვდელო მოდგმას ეკუთვნოდა. მისი ბაბუა, ყიდო, სმღვდელო გვარის თავკაცი იყო. აღნიშნული თანამდებობა წესით შვილს ბერექიას უნდა მიეღო, მაგრმა ის ახალგაზრდა ასაკში სამშობლოში დაბრუნებამდე ბაბილონში აღესრულა. მოგვიანებით სამღვდელო გვარის თავკაცი ზაქარია ხდება. სწორედ ამიტომ იხსენიება იგი წმინდა წერილში მრავალგან ყიდოს ძის სახელით.  ზაქარიას შესახებ ცნობები საკმაოდ მწირია. სავარაუდოდ, სამშობლოში დაბრუნებისას იგი საკმაოდ ახალგაზრდა იყო. წინასაწარმეტყველი ზორუბაბელისა და ანგიას თანამედროვეა.
წიგნის შინაარსი და მისი დაყოფა ზაქარიას წინასწარმეტყველება თოთხმეტი თავისგან შედგება და ორ ნაწილად იყოფა: პირველი რვა და დანარჩენი ექვსი თავი. პირველ ნაწილში გადმოცემულია ერთ ღამეში ნანახი რვა ხილვა, ხოლო მეორეში ნაუწყებია სამყაროს მომავალი.

წიგნის დაწერის მიზანი

       წინასწარმეტყველის მიზანია, უმძიმეს დღეში აღმოჩენილი იუდეველი ხალხი ტაძრის მშენებლობის საქმეში შეაგულიანოს. იმავდროულად, ზაქარია ცდილობს, ტყვეობიდან დაბრუნებული ადამიანების ყალბი წარმოდგენები ამხილოს და ერში გაბატონებული აზრი მესიის დაუყოვნებელი მოსვლის შესახებ რეალობით შეცვალოს.

♦ წინასწარმეტყველი ზაქარია ♦