წმინდა თეოდოსია მოღვაწეობდა მერვე საუკუნეში როცა ხატმებრძოლეობის ერესი მძვინვარებდა, როდესაც მშობლები გარდაეცვალა წმინდანს, იგი წავიდა კონსტანტინოპოლის დედათა მონასტერში. მალე კი მონაზვნად აღიკვეცა. ღირსმოწამე თეოდოსიამ მშობლების მიერ დანატოვარი ქონება გლახაკებს დაურიგა, თანხის ნაწილით კი მაცხოვრის, ღვთისმშობლის და წმიდა ანასტასიას ხატები დააწერინა. ლეონ ისავრიელმა ტახტზე ასვლისთანავე გამოსცა ბრძანება, რომელიც წმიდა ხატთა განადგურებას მოითხოვდა. მაშინ კონსტანტინეპოლში იყო ერთი კარიბჭე, რომლის თავზეც ოთხასზე მეტი წლის განმავლობაში მაცხოვრის სპილენძის ხატი იყო აღმართული.ხატმბრძოლმა ცრუ პატრიარქმა ანასტასიმ ბრძანა ხატის მოხსნა. მართლმადიდებლები წმიდა თეოდოსიას წინამძღოლობით მხნედ დადგნენ მის დასაცავად. ხალხის შფოთით შეშინებულმა ცრუპატრიარქმა მომხდარის შესახებ იმპერატორს აცნობა. ლეონ ისავრიელის ბრძანებით მონაზვნები ამოხოცეს, ხოლო მათი მეთაური, წმიდა თეოდოსია საპყრობილეში ჩააგდეს. წმიდანს 7 დღის განმავლობაში აწამებდნენ, მერვე დღეს კი ქალაქში გაიყვანეს და წამებით ამოხადეს სული. ქუჩაში დაგდებული ღირსმოწამის ცხედარი ქრისტიანებმა დიდი პატივით დაფლეს კონსტანტინეპოლის დიოკრისტის მონასტერში. მის საფლავთან მრავალი კურნება აღსრულდა.

◄ გუშინ | დღეს | ხვალ ►