რიჩარდ ბახის მოთხრობა "თოლია ჯონათან ლივინგსტონი" იმ ლიტერატურის ნაწილია, რომელმაც მეოცე საუკუნეში გადატრიალება მოახდინა ადამიანის ცნობიერებაში. ამ წიგნმა ადამიანებს დაანახა, რომ მიზანსწრაფვით, ნებისყოფით, თავისუფლების წყურვილით და მისთვის ბრძოლით შესაძლებელია განვითარება და სრულყოფილებამდე მიღწევაც კი. დაანახა, რომ ამქვეყნად ყველაზე მნიშვნელოვანი ღირებულება თავისუფლებაა და ღირს ბრძოლა მის მოსაპოვებლად.

      ჯონათან ლივინგსტონი თოლიაა, ერთი ჩვეულებრივი თოლია, არაჩვეულებრივი აზროვნებით, მას თავისუფლება, სრულყოფილება სწყურია.

      ჩემი აზრით, ნაწარმოები მეტისმეტად იდეალისტურია, ძალიან შორსაა რეალობისგან. თუმცა, რა თქმა უნდა, შესანიშნავი ნაწარმოებია: სასიამოვნო წასაკითხი, საინტერესო და დამაფიქრებელი. უტოპიურია თავისუფლების იმ სიმაღლემდე მიღწევა, რაც ჯონათანმა შეძლო, ანუ აბსოლუტური თავისუფლება, უსაზღვრო, სრულყოფილი არსებობა. თუმცა ჯონათანის სიტყვები: "ერთადერთი ჭეშმარიტი კანონი ისაა, რომელსაც თავისუფლებისკენ მივყავართ" სრული ჭეშმარიტებაა. შეიძლება რეალურ ცხოვრებაში ადამიანმა აბსოლუტურ თავისუფლებას ვერ მიაღწიოს, მაგრამ თავისუფლების გზაზე წინ გადადგმული ნებისმიერი ნაბიჯი უმნიშვნელოვანესია.

      ეს შესანიშნავი მოთხრობა ადამიანს თავისუფლების მნიშვნელობაზე, მის უზენაესობაზე დააფიქრებს და ბევრი პრობლემის დაძლევაშიც დაეხმარება. ნებისმიერი ადამიანის ცხოვრებაში დგება მომენტი, როცა ის თავს მარტოსულად, საზოგადოებისგან გარიყულად და დაუფასებლად გრძნობს. ეს წიგნი მას საკუთარი ადგილის პოვნაშიც დაეხმარება და საკუთარი თავის დაფასებაშიც.

      ერთხელ მაინც გაგჩენიათ სურვილი შეგეცვალათ ის გარემო, სადაც ცხოვრობთ, გაგეხადათ ის უფრო მრავალფეროვანი და საინტერესო, ერთხელ მაინც გდომებიათ ყოფილიყავით თავისუფალი. წიგნის წაკითხვის შედეგ დარწმუნდებით, რომ თუ მიზანდასახული ხარ და არც შრომა გეზარება, ყველაფერი გამოვა. აკი თოლიაც ბოლოსიმარჯვებს და ყველას დაარწმუნებს, რმ "ერთადერთი ჭეშმარიტი კანონი ისაა, რომელსაც თავისუფლებისკენ მივყავართ" მწერლის ენა სადა, მარტივი და დახვეწილია, ნაწარმოები კი ისეთი, დიდხანს რომ დაგაფიქრებს.

(ეს ის თოლიაა, ჯონათანი რომელზეც მღეროდა ალუდა და ასე ძალიან უყვარდა...)

იხილეთ სრული ვერსია:

• თოლია ჯონათან ლივინგსტონი