თურქი მწერალი ძალიან ბევრ მნიშვნელოვან საკითხს განიხილავს ქალაქ ყარსის შესახებ. ერთ - ერთი მთავარი პრობლემა კი ეს არის თვითმკვლელობა, რომელსაც ქალაქ ყარსში უფრო მეტად მიმართავდნენ ქალები, რომლებიც ძირითადად რელიგიური დოგმების მსხვერპლნი გახდნენ, ანუ იმ ვალდებულებების , რომლებიც თავსაფრის, გრძელი კაბის ტარებას და სხვადასხვა ტრადიციებს სავალდებულოს, აუცილებელს ხდიდა, მათი დარღვევის შემთხვევაში კი ისინი უდიდეს ზეწოლას განიცდიდნენ, იმდენად დიდს, რომ სიცოცხლეს თვითმკვლელობითაც კი ამთავრებდნენ. რა თქმა უნდა, სუიციდი ყველა დროის, ყველა ქალაქის, სოფლის თუ ქვეყნის პრობლემაა, უბრალოდ ავტორმა, ჩემი აზრით, ერთი კონკრეტული ადგილიდან კიდევ ერთხელ დაგვანახა თვითმკვლელობის ის გზები და მეთოდები, რასაც სასოწარკვეთილი მანდილოსნები მიმართავდნენ, თუმცა საკმაოდ შეუმჩნევლად, ისე გაატარებდნენ მთელ დღეს ოჯახის წევრებთად ერთად, ზოგჯერ მხიარულადაც, რომ საეჭვოს ვერაფერს შეამჩნევდით, თუმცა საკუთარ თავთან მარტო დარჩენის შემდეგ, საკუთარ თავს ანადგურებდნენ. როგორც ავტორი აღნიშნავს, სუსტი სქესის წარმომადგენლები ზოგჯერ სიკვდილის ერთნაირ გზებსაც კი მიმართავდნენ, რომელიც ითვალისწინებდა თავის ჩამოხრჩობას, წამლების დიდი დოზით მიღებას და სხვა.

      "თოვლის" ერთ - ერთი მთავარი პერსონაჟი ქადიფე , რომელიც ერთ დროს თავადაც ფიქრობდა თვითმკვლელობაზე, ქალების ამ ნაბიჯს მიაწერდა მათსავე სიამაყეს, ანუ ისინი თითქოს ამით ამტკიცებდნენ სიძლიერეს და დაუმორჩილებლობას.       არამარტო მანდილოსნების, არამედ ნებისმიერი პიროვნების სუიციდის მიზეზი, ფსიქიატრიული პრობლემების გარდა, მიმაჩნია ის აუტანელი გარემო, რომელსაც ადამიანები ზოგჯერ სრულიად გაუცნობიერებლად ქმნიან. მათი უაზრო შეგონებები, ამბიციები, აბსურდული დოგმები შეიძლება არაერთი სუსტი პიროვნების სიკვდილის მიზეზი გახდეს. რაც შეეხება თვითმკვლელობით სიძლიერის დამტკიცება საკმაოდ პარადოქსული მგონია, სიძლიერე ისაა, როდესაც უძლებ სამყაროს ურთულეს გამოცდებს, არ აძლევ საშუალებას ბრბოს, რომ მათი მსხვერპლი გახდე, მოქმედებ შენი წარმატებისთვის, ნაკლებ ყურადღებას აქცევ იმას თუ შენზე რას ამბობენ, სიძლიერე სწორედ ცხოვრებაა, ისეთი არსებობა, როცა ბევრი განსაცდელი გაქვს, მაგრამ მაინც ცდილობ ბედნიერების შენარჩუნებას.

"არ გაბედო სიკვდილი, სანამ ცოცხალი ხარ!"