არ შეიძლება მარტვილში ვიყოთ და არ გავოცდეთ... ის ტურისტული ბილიკები რომლებადაც მარტვილის მდინარის ხეობები, მღვიმეები მოინათლა, შეუძლებელია საოცრებებად არ აღვიქვათ...ძირითადად აი რა ხდება : 

გაჭედილის კანიონი მდებარეობს სოფელ გაჭედილსა და ინჩხურს შორის. მდ. აბაშა კვეთს ანტიკლინურ სერს და წარმოქმნის გაჭედილის კანიონს, რომლის სიგრძეა 2400 მ, ხოლო ჩაჭრის სიღმე – 20-40 მ. რამდენიმე ადგილას კანიონი საფეხურებრივია და შუა ნაწილში 12 მ სიმაღლის მარტვილის ცნობილ ჩანჩქერს წარმოქმნის. კანიონში ნავით საკმაოდ ღრმად შეცურვა არის შესაძლებელი.
 

გაჭედილის კანიონიდან 3.5 კმ დაშორებით სოფ. პირველ ბალდაში მდებარეობსმოთენას მღვიმე. სოფლამდე ავტოტრანსპორტის სავალი გზაა. აღმოსავლეთით არსებულ ტაბაკელას ქედზე მდებარეობს მოთენას მღვიმე, რომლისკენაც სოფლიდან მიემართება 0.5 კმ სიგრძის ბილიკი

მოთენას მღვიმე (ზ.დ. 570 მ) გამომუშავებულია ეოცენურ შრეებიან კირქვებში. მღვიმე ჰორიზონტალურია და აღმავალი. მისი წინა ნაწილი ჩამონგრეულია და ღია ხეობას წარმოადგენს. მოთენას მღვიმე შედგება ორი დიდი დარბაზისგან, რომლებიც ერთმანეთთან დაკავშირებულია ვიწრო ხვრელით. პირველი დარბაზის სიგრძეა 30 მ, სიმაღლე – 24-25 მ. მღვიმის ჯამური სიგრძეა 75 მ. ქიმიური ნალექებიდან შეინიშნება სტალაქტიდები, სტალაგმიტები, ტრავერტინის კასკადები და ფარდები; მექანიკურიდან – ლოდები და თიხის ნაფენები; გაედინება მცირე მდინარე. მღვიმეში ბინადრობენ ღამურები, ობობები, მწერები და სხვ. აქვეა ისტორიული დროის ნაგებობა, რომელიც შუა საუკუნეებში გამოყენებული იყო ციხე-სიმაგრედ. მღვიმე ადვილი გასავლელია.  მღვიმის მონახულების შემდეგ ვბრუნდებით სოფ. პირველ ბალდაში, ავტომობილით გზას ვაგრძელებთ სოფლის ბოლოს მდებარე კანიონისკენ, რისი დათვალიერებაც შესაძლებელია კანიონზე გადებული ხიდიდან. ამის შემდეგ საფეხმავლო ბილიკით გზას ვაგრძელებთ ტობას ჩანჩქერებისკენ და 5 კმ დაშორებით ვბანაკდებით ადგილ ჯვარიშთან, სადაც შესაძლებელია კარვების გაშლა, მოიპოვება სასმელი წყალი და შეშა.