12 მოციქულთაგან ერთ-ერთი გახლდათ წმიდა მოციქული იაკობ ზებედეს ძე, რომელიც თავის ძმასთან - მოციქულ იოანე ღვთისმეტყველთან ერთად იქნა მოწოდებული ქრისტეს მიერ.

     წმიდა იაკობი, სულიწმიდის გარდამოსვლის შემდეგ ქადაგებდა, როგორც ესპანეთში, ისე სხვა ქვეყნებში. თუმცა, შემდეგ კვლავ იერუსალიმს დაუბრუნდა. მოციქული დაუღალავად ქადაგებდა იესო ქრისტეზე, როგორც მაცხოვარზე და ამხელდა ფარისევლებს ურწუნოების გამო. ვერანაირ წინააღმდეგობას ვერ უწევდნენ იუდევლები ქრისტეს მადლით მოსილ მოციქულს და რომ ვერაფერს გახდნენ, ფულით მოისყიდეს ფილოსოფოსი - მოგვი ჰერმოგენი, რათა კამათში გამოეწვია წმიდა იაკობი და გაეცამტვერებინა მისი შეხედულებები ქრისტეზე, როგორც აღთქმულ მესიაზე. მოგვმა თავდაპირველად მოციქულთან თავისი მოწაფე ფილიპე გაგზავნა, მაგრამ უფლის ნებით იგი ჩასწვდა ჭეშმარიტებას და ირწმუნა ქრისტე. შემდეგ თვით ჰერმოგენიც დარწმუნდა ღვთის ყოვლისშემძლეობაში, დაწვა ჯადოქრული წიგნები, ნათელ-იღო და ქრისტეს ჭეშმარიტ მიმდევრად იქცა.

     დაახლოებით 40-44 წლებში, ჰეროდე აგრიპამ ურწმუნო იუდეველების რჩევით შეიპყრო იაკობ მოციქული და სიკვდილით დასჯა მიუსაჯა. მოციქული იმდენად იყო ღვთის რწმენაში განმტკიცებული, რომ სრულიად მშვიდად შეხვდა სასიკვდილო განაჩენს.იგი უკანასკნელ წუთამდე განაგრძობდა ქრისტეს სჯულის ქადაგებას. ერთ-ერთი დამსმენი, სახელად იოსია, გაოცდა მოციქულის ვაჟკაცობით და ირწმუნა ქრისტე-მესიის განკაცება. სანამ მოციქულს სიკვდილით დასასჯელად წაიყვანდნენ, იოსია ფეხებში ჩაუვარდა მას, მოინანია თავისი ცოდვა და მიტევება ითხოვა. 44 წელს, იერუსალიმში წმიდა იაკობი და იოსია ერთად, მოწამეობრივად აღესრულნენ.

◄ გუშინ | დღეს | ხვალ ►