ქრისტეს შობიდან IV ს-ის დასაწყისში ქალაქ ანაკვირიაში მოღვაწობდნენ და მოწამეობრივად აღესრულნენ წმიდა მოწამე თეოდოტე ანკვირელი და შვიდი ქალწული: ალექსანდრა, ტეკუსი, კლავდია, ფაინა, ევფრასია, მატრონა და იულია.

     იმპერატორმა დიოკლეტიანემ ანკვირიაში ქრისტიანთა დასასჯელად დანიშნა სისასტიკით ცნობილი თეოტეკნი, რომელმაც ქრისტიანები გააფრთხილა, რომ კერპებისთვის მსხვერპლი შეეწირათ, წინააღმდეგ შემთხვევაში მათ წამება და სიკვდილი არ აცდებოდათ. მრავალმა ქრისტიანმა დატოვა სახლი და ქალაქიდან გაიქცა. დარჩენილებს წარმართები გვემდნენ და ძარცვავდნენ.

     მთელ ქვეყანაში შიმშილობა გამეფდა, თუმცა ამ მძიმე დღეებში კი წმიდა თეოდოტე თავის ოჯახში კვებავდა ქრისტეს აღმსარებლებს. გაძარცულ ეკლესიებს სწირავდა საღვთო ლიტურღიის შესასრულებლად საჭირო ნივთებს. წმიდანი ასევე უშიშრად შედიოდა საპყრობილეებში, ეხმარებოდა უდანაშაულოდ დასჯილებს და განამხნევებდა მოსალოდნელი აღსასრულის წინ. ყველანაირად ცდილობდა მეომრებისაგან გამოესყიდა ქრისტიანთა გვამები და პატივით დაეკრძალა ისინი. მოგვიანებით, როდესაც ანკვირიაში ქრისტიანული ეკლესიები გაძარცვეს და დაკეტეს, უფლის ნებით საღვთო ლიტურღია წმიდა თეოდოტეს სახლში სრულდებოდა.

     ქრისტიანთა სასტიკი დევნა გრძელდებოდა. იმ დროს ქრისტესთვის მოწამეობრივად აღესრულა 7 ქალწული. მათგან უფროსი, წმიდა ტეკუსი, წმიდა თეოდოტეს დეიდა იყო. წმიდანებმა თეოტეკნის სამსჯავროზე თამამად აღიარეს ქრისტე, რისთვისაც მათ ქვები გამოაბეს ყელზე და ტბაში ჩაახრჩვეს. მეორე ღამეს წმიდა ტეკუსი ძილში გამოეცხადა წმიდა თეოდორეს და შეევედრა, ტბიდან ამოეღო მათი ცხედრები და ქრისტიანულად დაემარხა. წმიდანმა წაიყვანა მეგობარი პოლიხრონიოსი, სხვა ქრისტიანები და ცხედრების ტბიდან ამოყვანა მოახერხეს, რის შემდეგაც მოწამეთა გვამები ეკლესიის ეზოში დამარხეს. როცა მმართველმა გაიგო წმიდანთა ცხედრების ამბავი, განრისხდა და ბრძანა, ყველა ქრისტიანი შეეპყროთ და ეწამებინათ. სხვებთან ერთად პოლიხრონიოსიც დაიჭირეს. მან წამებას ვერ გაუძლო და განაცხადა, რომ ყველაფრის მიზეზი წმიდა თეოდოტე იყო. წმიდანს სასამართლოზე დიდძალი სიმდიდრე შესთავაზეს ქრისტიანობის სანაცვლოდ, თუმცა წმინდა თეოდიტემ ისევ უფალი ადიდა. გამძვინვარებულმა წარმართებმა საშინლად აწამეს წმინდანი, თუმცა ღმერთის მფარველობით ცოცხალი გადარჩა. წმიდა მოწამე ამჯერად დილეგში ჩააგდეს და მეორე დღეს კვლავ განაგრძეს მისი წამება, ბოლოს კი თავი მოკვეთეს. მაგრამ უცებ ამოვარდნილმა გრიგალმა მეომრებს წმიდანის ცხერის დაწვის საშუალება არ მისცა. ღვთის ნებით ამ ადგილას გამოიარა მღვდელმა ფრონტონმა, წმიდა ცხედარი ვირს აჰკიდა და წმიდა თეოდოტეს მიერ წინასწარ შერჩეულ ადგილას დაკრძალა იგი. წმინდანი დაახლოებით 304 წელს აღესრულა. მოგვიანებით მის საფლავზე ეკლესია აშენდა.

     წმიდანის ცხოვრება და მოწამეობრივი აღსასრული და აგრეთვე წმიდა ქალწულთა ვნებანი აღწერა ნილოსმა, რომელიც გახლდათ წმიდა თეოდოტეს თანამედროვე და რომელიც ქრისტიანთა დევნის დროს ცხოვრობდა ანკვირაში.

◄ გუშინ | დღეს | ხვალ ►