2 ოქტომბერს (ძვ. სტ. 19 სექტემბერს) ქრისტეს ეკლესია იხსენიებს წმინდა ზოსიმე კილიკიელს.

      წმიდა მოწამე ზოსიმე მეუდაბნოე IV საუკუნეში ცხოვრობდა. ერთხელ, ნადირობის დროს, კილიკიის მმართველ დომენტიანეს შეხვდა შემთხვევით, რომელიც მშვიდად და ალერსიანად ესაუბრებოდა მის ირგვლივ მყოფ ნადირებს. მონადირეთა დანახვაზე მხეცებს შეეშინდათ და გაიქცნენ. ბერს ჰკითხეს, თუ ვინ იყო და ამ უდაბნოში რატომ ცხოვრობდა, მან კი უპასუხა, ზოსიმე მქვია, ქრისტიანი ვარ და ქალაქში იესო ქრისტეს მტრების გვერდით ყოფნას მხეცებთან ცხოვრება მირჩევნიაო. დომენტიანე დაემუქრა: „თუ ნაზარეველს ეთაყვანები, ნაზარეთში სახალხოდ სასტიკად გაწამებ და ქრისტეს უარყოფასაც გაიძულებო“, შემდეგ კი წმიდანს ჰკითხა, რა ძალით ათვინიერებდა ველურ ცხოველებს. მოხუცმა მიუგო: „მე - ქრისტიანი ვარ და ყოველი სული ქრისტეს ემორჩილება“. უსჯულოებმა შეიპყრეს მაცხოვრის მსასოებელი მამა, ნაზარეთში წაიყვანეს და სასტიკად ტანჯავდნენ და აწამებდნენ. წმიდანი თავდაღმა დაკიდეს, კისერზე დიდი ლოდი გამოაბეს და რკინის ჩანგლებით სხეულის ჯიჯგნა დაუწყეს. უღმრთოები მარტვილს ეუბნებოდნენ: „თუ მხეცებიც გემორჩილებიან, რომელიმე მათგანს უბრძანე, აქ გამოცხადდეს, მაშინ ჩვენც ვირწმუნებთ შენს ღმერთს“. ზოსიმე ლოცვით შეევედრა ღმერთს და უეცრად წამების ადგილას უზარმაზარმა ლომმა მოირბინა. ყველანი შეშინებულნი გაიქცნენ, ლომი კი წმიდანთა მივიდა და კისერზე გამობმული ლოდი აღუმსუბუქა. მმართველმა ზოსიმეს სთხოვა, ნადირი დაეოკებინა, ჯალათებს კი წმიდანის ჩამოხსნა უბრძანა, რომ იგი იმპერატორთან წაეყვანა, მაგრამ ზოსიმემ წმიდა სული იქვე შეჰვედრა უფალს (წმ. ზოსიმეს იხსენიება 4 იანვარსაც).

◄ გუშინ | დღეს | ხვალ ►