სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსის და ბიჭვინთისა და ცხუმ-აფხაზეთის მიტროპოლიტის, უწმიდესისა და უნეტარესის ილია მეორის ლოცვა-კურთხევით უკვე მესამე წელია ქალაქ თბილისში მოქმედებს საქართელოს საპატრიარქოს წმიდა კეთილმსახური მეფე თამარის სახელობის სკოლა-პანსიონი.

      2009 წლის ივნისში საქართველოს პრეზიდენტის განკარგულებით ყოფილი მუსიკალური სკოლა-ინტერნატის შენობა-ნაგებობები საკუთრებაში (სიმბოლურ ფასად ერთ დოლარად) გადაეცა საქართველოს საპატრიარქოს და სრულიად საქართველოს კათილოკოს-პატრიარქის ლოცვა-კურთხევით დაფუძნდა საპატრიარქოს წმიდა კეთილმსახური მეფე თამარის სახელობის სკოლა-პანსიონი.

      პატრიარქის ლოცვა-კურთხევით სკოლა-პანსიონის ეზოში დაარსდა დიდი საეკლესიო და საერო მოღვაწის წმიდა ტბელ აბუსერისძის ეკლესია, რომელიც თამარის თანამედროვე გახლდათ. ტაძრის წინამძღვრად დადგინდა დეკანოზი მირიან სამხარაძე. ამავდროულად მამა მირიანი დაინიშნა სკოლა-პანსიონის დირექტორად. პედაგოგიური კოლექტივი შეირჩა ორი კრიტერიუმით - ეს არის პროფესიონალიზმი და სარწმუნოება. ჩვენი ყველა პედაგოგი არის ეკლესიის წევრი, აღმსარებელი, მაზიარებელი, ამასთანავე პროფესიონალი. დღეისათვის სკოლა-პანსიონში 10 კლასში 360-მდე მოსწავლე სწავლობს, აქედან 76 ბავშვი საქართველოს თითქმის ყველა კუთხიდან პანსიონში ცხოვრობს, მათ შორის უმეტესობა მაღალმთიანი აჭარიდან და ჰერეთიდან, რომლებიც ცხოვრობენ ჩვენთან პანსიონში და უზრუნველყოფილნი არიან ოთხჯერადი კვებით, აღმზრდელობითი მომსახურეობით, სწავლის, გართობისა და დასვენების კარგი პირობებით. ჩვენთან ხდება ორი რელიგიის მუსულმანი და ქრისტიანი ბავშვების თანაცხოვრება. ეს ნათელი მაგალითია იმისა, თუ ჩვენი უწმიდესი და საპატრიარქო როგორ ზრუნავს სხვადასხა აღმსარებლობის ქართველებზე.

      სასწავლო პროცესი დაფუძნებულია ეროვნულ სასწავლო გეგმაზე. ზოგადად მუშაობა დამყარებულია ზოგადი განათლების ეროვნულ მიზნებზე, რათა ხელი შეუწყოს მოსწავლეებში გონებრივი და ფიზიკური უნარების განვითარებას, ჯანსაღი წესის დამკვიდრებას, სკოლის, ოჯახისა და ეკლესიის ურთიერთობების განმტკიცებას. შემოღებული გვაქვს დამატებითი საგანმანათლებლო პროგრამაც, საღვთო სჯული და ძველი ქართული ენა. მოსწავლეები მონაწილეობენ სხვადასხვა კონკურსებში, შემოქმედებით კონფერენციებსა და ოლიმპიადებში და მიუხედავად ჩვენი სკოლის არცთუ ისე დიდი ხნის ისტორიისა გარკვეულ წარმატებებს მივაღწიეთ. მოსწავლეთა დიდი ინტერესი გამოიწვია სკოლაში 66-ე სასწავლო-შემოქმედებითმა კონფერენციამ, სადაც მოსწავლეებმა საკუთარი კვლევა-ძიებაძე შექმნილი თემები წარმოადგინეს, მათგან 24 საუკეთესო წარდგენილი იქნა რესპუბლიკურ კონფერენციაზე. სკოლა-პანსიონში ჩატარდა ეროვნული-სასწავლო ოლიმპიადის სასკოლო ტურები დებულებით გათვალისწინებულ ყველა საგანში და გამარჯვებული მოსწავლეები გადავიდნენ მეორე ეტაპზე.

      2011 წლის 11 აპრილს სკოლა-პანსიონმა გაიარა ავტორიზაცია და სკოლა-პანსიონს მიენიჭა ზოგადსაგანმანათლებლო დაწესებულების სტასუსი და სტატუსის ფარგლებში პროფესიული საგანმანათლებლო პროგრამების განხორციელების უფლებამოსილება.

      გამომდინარე აქედან მიმდინარე სასწავლო წელს სკოლამ დაიწყო პროფესიული საგანმანათლებლო პროგრამის განხორციელება (ხის მხატვრული დამუშავება, თექის დამუშავება, ჭრა-კერვა მოდელირება და მინანქარი) და დღეისათვის პროფესიულ სწავლებას ეუფლება 80-მდე სტუდნეტი, მათთვის ყველა პირობაა შექმნილი სათანადო პროფესიული განათლების მისაღებად.

      სკოლას აქვს მუსიკალური მიმართულება. სკოლაში მოსწავლის მიღების ერთ-ერთი პრიორიტეტია მათი მუსიკალური მონაცემები. ჩვენი სკოლის თითქმის ყველა მოსწავლე გაერთიანებულია სხვადასხვა სახის მუსიკალურ წრეებში (საფორტეპიანო ჯგუფები, ქართულ-ხალხური სიმღერების ვაჟთა და გოგონათა გუნდები, ქართულ-ხალხურ საკრავთა ჯგუფები). ჩვენი ყველა მოსწავლე ეუფლება გალობას.

      ამჟამად შეიქმნა ხატვის წრე, რომელშიც ხატვის ნიჭით დაჯილდოებული ბავშვები არიან ჩაბმულნი.

      სკოლა-პანსიონში დიდი ყურადღება ექცევა სპორტულ-გამაჯანსაღებელ მუშაობას. გახსნილი გვაქვს სხვადასხვა სპორტული წრეები და სექციები, მათ შორის მნიშვნელოვანია ქართული ორთაბრძოლის ხელოვნების წრე.

      დაუვიწყარი და უმნიშვნელოვანესი იყო მოსწავლეთათვის ის დღეები, როდესაც სკოლა-პანსიონს სტუმრობდნენ სასულიერო პირები, უმნიშვნელოვანესი იყო სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსის და ბიჭვინთისა და ცხუმ-აფხაზეთის მიტროპოლიტის, უწმიდესისა და უნეტარესის ილია მეორის მობრძანება სკოლაში და მისი შეხვედრა მოსწავლეებთან.

      დაუვიწყარია ბავშვებისათვის ბათუმისა და ლაზეთის, ჩრდილოეთ ამერიკისა და კანადის მიტროპოლიტის მეუფე დიმიტრის, მეუფე იაკობის, მეუფე იოანეს, მეუფე სპირიდონის სტუმრობა.