იმდენი მაქვს სათქმელი, ფიქრი ამერია და
მოგიყვები მაგის დროც ალბათ მალე იქნება
ნაწვიმარი აპრილი როგორ ამეკვიატა
ახლა მიჭირს ქალაქში შენი სახლის მიგნება

იმდენი მაქვს სათქმელი რომ დავიწყო საიდან
გახსოვს? ღამე თავსხმაში ფეხით როგორ გვივლია
მერე თითქოს გაცივდი წახვედი და ჰაიდა
უშენობა ძალიან მეც არ დამიჩივლია

იმდენი მაქვს სათმელი მე რა ჟამი გამწვდება
მეფიქრება შენზე და ქარმა გზები არია
ახლა მაინც სახლში ხარ და ვინ გაგიბრაზდება
მე სულ მაგვიანდება მართლა საოცარია

იმდენი მაქვს სათქმელი უფრო მეტი შენდობა
უფრო მეტი კოცნა და ყვავილების წელია
ახლაც ვიცი შენსავით მე არავინ მენდობა
შეპარული მზერა კი ახლა უფრო მწველია

იმდენი მაქვს სათქმელი შენი ნახვა მჭირდება
ახლა უფრო ძლიერი გიბრუნდები ომიდან
და ყველაფრის მოყოლა ვიცი გამიჭირდება
კართან შვილი იყვირებს დედა, მამა მოვიდა....