ადამიანიც მაშინ გქვია და გერქვას ამინ!

თუ ძალგიძს დარჩე ძველებურად მშვიდი და მტკიცე

და არ დაიბნე როცა თავგზა ებნევა ყველას,

თუ ძალგიძს სიმხნედ ,შემართებით და რწმენად იქცე

როცა შენ ირგვლივ მკვდარი არის შენდამი რწმენა,

თუ ძალგიძს მკაცრი მოთმინებით ელოდო ხვალეს

ცრუს გაუტანელს არ მიაგო, სიცრუე, ავი.

მოძულეს შენსას სიძულვილი შეუნდო მალე

და თან არც ქრისტედ არ აჩვენო არავის თავი

თუ შეგიძლია სულში მარად ოცნება რეკდეს,

მაგრამ ოცნების არასოდეს არ იქცე მონად.

გამარჯვებას და დამარცხებას თანაბრად შეხვდი

და ამ ორ თაღლითს მიაგებო ტოლად და სწორად

თუ შეგიძლია აიტანო სიმართლე შენი

ბრბომ სულმდაბალმა ვით აქცია ხითხითის საგნად.

იხილო ერთ დღეს დანგრეული სიცოცხლის დღენი

რასაც შესწირე და შენებას შეუდგე ახლად.

თუ შეგწევს ძალა მაგიდაზე დაყარო ჩალად

რაც გაგაჩნია, გიშოვნია ოფლით და სისხლით.

წააგო წყნარად წაგებული ჩათვალო არად

იშოვნო კვლავ და სასწორზე შეაგდო რისკით.

თუ შეგწევს ძალა წარბი შეკრა, მოთოკო გული

მოუხმო ნერვებს, გამაგრდე და ივარგო ასწელ...

და ეს კი მაშინ, როს სულიერად დაღლილს და დაცლილს

ნებისყოფაღა გეუბნება "წინ მეთქი გასწი!"

თუ შეგწევს ძალა ბრბოში იყო და დარჩე კაცად

მეფეებს ახლდე და გახსოვდეს მარადჟამ ხალხი.

შენი ღირსება არ დაკარგო აროდეს არსად!

მტერ-მოყვარესთან პირდაპირი იყო და ლაღი!

თუ შეგწევს ძალა, გაიაზრო ყოველი წუთი,

აზრით დატვირთო სამოცივე ფერხმარდი წამი.

მაშინ შენია შვილო ჩემო ეს მიწის ბურთი!

ადამიანი მაშინ გქვია, და გერქვას ამინ!!!