ზეცა ცაზე მაღალია
თუ ეს ძილია,და თუ ეს ძილი მძიმეა,
მე ვსვამ წერტილებს,ვეძებ სწორ ფორმებს -
ვაფორმებ წარწერებს,სიზმრებს-მრავალწერტილს.
მაქვს ხელნაწერი - მოოქროვილი, ლალისფერი...
(ან უფრო ძოწი) - ნაწვეთარი ბროწეული;
ეს შორეული ღრუბელია - მძინარეთა სასთუმალი
ვითარცა ბედისწერა;
ახლა ახლოა ყველა ფერი - ძლიერია ხელი;
სხეული - ცხელი;
გამოცდილი - ომგამოვლილი;
მინდობილი - დანებებული;
მკლავს მოლოდინი; - მკლავს წყურვილი;
ახალია აღთქმა - გულისხმიერია და ღრმა,
ვითარცა ტკივილი და ვითარცა ვნება;
ეს ძილს არა ჰგავს, მზერა მზემ ჩაყლაპა;
აქ თვალი მზეზე დიდია;
სიტყვებში ჩავიდა წარსული;
აღთქმა დავდე -
სიტყვამ შემოფარგლა დედამიწა-
ცისარტყელა.გზა.
..............................................................
თუ ეს მძიმეა, და ეს ძილია, მე ვსვამ წერტილს.
..................................................................................
("ნული, როგორც კვერცხი, ვითარცა დასაბამი და დასაწყისი")
..................................................................................
აქ ყველაფერი მაღალია, ვით ზეცა - ცაზე.