თითოეული ქალაქს აქვს ალბათ რაღაც ისეთი, რაც სხვა ქალაქებისაგან განასხვავებს და ამით განსაკუთრებულს ხდის მას. ქალაქი, რომელზეც ახლა ვისაუბრებ, არის ვროცლავი, რომელიც პოლონეთში მდებარეობს და ტურისტებში საკმაოდ დიდი პოპულარობით სარგებლობს. მისი ერთ-ერთი უმთავრესი სავიზიტო ბარათი კი არის ბრინჯაოს ჯუჯები, რომლებიც მთელს ქალაქში არიან მიმოფანტულნი. მათი რიცხვი დღეისათვის დაახლოებით 300-ს აღწევს, ალბათ სწორედ ამიტომ არსებობს სპეციალური რუკები და ბროშურები მათ აღმოსაჩენად.

     ეს ის ქალაქია, სადაც ზევით ყურების ნაცვლად დაბლა უნდა იყუროთ, რათა შემთხვევით რომელიმე პატარა ჯუჯას ფეხი არ წამოკრათ, თუმცა მას ნამდვილად არაფერი დაუშავდება, არ იდარდოთ, მთავარია თქვენ დარჩეთ მთელი და უვნებელი!

     ვროცლავის ხსენებაზე შეიძლება ბევრ ტურისტს სწორედ ჯუჯები ახსენდება, თუმცა ამ ადამიანების უმეტესობამ ალბათ არც იცის ჯუჯების წინარე ისტორია და ის თუ რატომ არის სწორედ ვროცლავი ჯუჯების ქალაქი.

     პოლონეთის ერთ-ერთი ძლიერი მოძრაობა სოციალიზმის წინააღმდეგ იყო "ნარინჯისფერი ალტერნატივა", მხატვარი ვლადიმერ ფრიდრიხის მეთაურობით. ამ მოძრაობის ერთ-ერთი პროტესტის ფორმა იყო ჯუჯების ხატვა შენობებზე პოლონეთის სხვადასხვა ქალაქებში. 1987 წელს კი ვროცლავის ცენტრალურ მოედანზე "ჯუჯების დემონსტრაციის" სახელწოდებით გაიმართა აქცია. მართალია აქციას რაიმე მნიშვნელოვანი შედეგი არ მოჰყოლია, მაგრამ ეს ითვლება ერთ-ერთ ყველაზე ორგანიზებულ აქციად. სწორედ "ნარინჯისფერი ალტერნატივის" სიმბოლიკის მოტივებზე დაყრდნობით დაამშვენეს ჯუჯებმა ქალაქი ვროცლავი. ასე გახდა ბრინჯაოს ეს პატარა ჯუჯები 2001 წლიდან ვროცლავის ერთ-ერთი ღირსშესანიშნაობა. დღეს ჯუჯებმა დამატებითი ფუნქციებიც შეიძინეს და ისინი ხშირ შემთხვევაში რეკლამის ან გზამკვლევის ფუნქციასაც ასრულებენ.

კეთილი იყოს თქვენი მობრძანება ჯუჯების სამყაროში!

ცოტა წავუშოპინგე!

ნეტავ, რამდენ ხანს უნდა ვიდგე დარაჯად ამ სიცივეში?!

ვისაც ჭამა გიყვართ, მოით!

სულ ჩემია, ერთიც და მეორეც!

აბა, დღეს რა გემრიელობები მომიტანე?!

აჰა, სულ შენი იყოს!

დაასხი, ნუ გენანება!

ბოლო ჭიქა არ უნდა დამელია!

მაფია დღისითაც მუშაობს!

აბა რა სელფი, მოდით მამა-პაპურად ფოტო გადაგიღოთ!

კიდევ 5 წუთი და ავდგები!

ვეტერანული სალამი ვროცლავიდან!

ბიჭოს, ხანძარია, ჩქარა!

აბა წყალი, ცივი წყალი, ვროცლავის წყალი!

გასწი ცხენო, გაგაჭენო!

მიდი მიაწექი, ესეც გადავაგოროთ!

ფულების სუნი მცემს!

ჩემი ახალი სახლი!

არ გელაპარაკები!.. მაინც არ ჩამოვალ!

ეს სასტუმრო სწორედ საჩემო უნდა იყოს!

ჩემი მოკრძალებული საჩუქარი!

არ უნდაო სიყვარულს მალვა, პოლონელებმა!

დედამიწას სიყვარული ამოძრავებს!