რუსთავის თვითმმართველობის მხარდაჭერით, 2008 წლის ომში გმირულად დაღუპული, IV ქვეითი ბრიგადის 42-ე ბატალიონის კაპრალის – ვახტანგ გზირიშვილის ხსოვნისადმი მიძღვნილი საღამო გაიმართა.ღონისძიებაზე, რომელიც, რუსთავის თეატრში გაიმართა, საქართველოს თავდაცვის მინისტრი ირაკლი ალასანია, ასევე, ადგილობრივი ხელისუფლების, საქართველოს შეიარაღებული ძალების, საქართველოს პარლამენტის უმრავლესობისა და უმცირესობის წარმომადგენლები, სასულიერო პირები, ვახტანგ გზირიშვილის ოჯახის წევრები და თანამებრძოლები იმყოფებოდონენ.ხსოვნისადმი მიძღვნილი ღონისძიების ფარგლებში, თეატრის ფოიეში გამოფენა მოეწყო, სადაც ვახტანგ გზირიშვილის ფოტოები და ნივთები იყო წარმოდგენილი. ასევე, მისი ცხოვრების ამსახველი ავტობიოგრაფიული წიგნის „არ დაიდარდო დედაო“–ს პრეზენტაცია გაიმართა. მოგვიანებით, გმირულად დაღუპული სამხედრო რუსთავის თეატრისა და კულტურის ცენტრის მსახიობებმა და თანამებრძლებმა გაიხსენეს.“ვახტანგმა საკუთარი სიცოცხლე გმირულად გასწირა ჩვენი ქვეყნისათვის. მას მაგალითი მამამისმა, ბატონმა ბადრიმ მისცა, რომელიც აფხაზეთის ომის დროს ტამიშის ბრძოლაში დაიღუპა. გასაკვირი არ არის, რომ ასეთ ოჯახში აღზრდილი კაცი ვაჟკაცი იქნებოდა და საკუთარი ქვეყნის დასაცავად გაუწევდა გული. ღონისძიება არის დასტური იმისა, რომ საზოგადოებას არასდროს გაუნელდება ამ გმირების მიმართ ინტერესი. ჩვენი და სახელმწიფოს ვალია, რომ მათ ხსოვნას გავუფრთხილდეთ და მომავალი ჯარისკაცები, მომავალი თაობა სწორედ ასეთი სულისკვეთებით აღვზარდოთ” – განაცხადა თავდაცვის მინისტრმა ირაკლი ალასანიამ.დღეს, ვახტანგ გზირიშვილს 25 წელი შეუსრულდებოდა. იგი 2008 წლის 8 აგვისტოს რუსეთ-საქართველოს ომში, საბრძოლო ოპერაციის შესრულებისას დაიღუპა. სიკვდილის შემდეგ მას ვახტანგ გორგასლის პირველი ხარისხის ორდენი მიენიჭა.