რელიგიური ტოლერანტობა – ქართველების მეტად სახასიათო თვისება, რომელმაც თავის კულმინაციას დავით აღმაშენებლის ეპოქაში მიაღწია. ამავე სახელწოდების კურსი, რომელიც გამორჩეული იყო თავისი მრავალფეროვნებითა და ეკლექტიკურობით, მუდამ დარჩება ჩემს მახსოვრობაში, როგორც ერთ–ერთი ყველაზე ინფორმატიული კურსი. ამ კურსის გარეშე ალბათ ვერასდროს წარმოვიდგენდი თუ რამდენი კავშირის მოძებნა შეიძლება რელიგიასა და ხელოვნებას, სპორტსა თუ პოლიტიკას შორის. ყველაზე საინტერესო, რაღა თქმა უნდა, იყო ტური, რომლის ფარგლებშიც მოვინახულეთ სინაგოგა, მეჩეთი და კათოლიკური ეკლესია, სადაც აქამდე არასდროს ვიყავი ნამყოფი. აღნიშნული კურსის მეშვეობით, რელიგიას სულ სხვა რაკურსით შევხედე და დავრწმუნდი იმაში, რომ რელიგიას კიდევ უფრო ყოვლისმომცველი ბუნება ჰქონია, ვიდრე ეს აქამდე წარმომედგინა.

      მინდა გულწრფელი მადლიერება გამოვხატო კურსის ტრენერისა და თითოეული ორგანიზატორის მიმართ. ცოდნა და გამოცდილება, რომელიც მივიღე ამერიკული კუთხის მიერ ორგანიზებულ ამ პროექტში, უცილობლად, წაადგება ჩემი ანალიტიკური აზროვნების განვითარებასა და საკითხებისადმი განსხვავებული კუთხით მიდგომის საჭიროებაში გაწაფვას.