რელიგიურობა, ჩემი აზრით, ყველაზე რთული რამაა რაც შეიძლება რომ განიმარტოს. მეტისმეტად რთულია ისაუბრო მასზე და მის საზომზე. საინტერესოა ის თუ რა იგულისხმება ზუსტად მოცემულ ტერმინში და რომელ გრძნობას შეგვიძლია, რომ ვუწოდოთ რელიგიური. ჩემი აზრით, ტერმინში „რელიგიურობა“ იგულისხმება, რომ ადამიანს სწამს, სჯერა და ემორჩილება იმ ღმერთს, რომელიც მის წარმოდგენებში არსებობს როგორც ღმერთი. ადამიანთა უმრავლესობას სჯერა ღმერთის, მაგრამ მათი რწმენა-წარმოდგენები განსხვავებულია თუნდაც ეს ეხებოდეს ერთი და იმავე რელიგიის მიმდევრებს. რელიგიურობის საზომი კი ჩემი გადმოსახედიდან არის ის თუ როგორ ზრუნავს ესა თუ ის ადამიანი გარშემომყოფებზე და რას აკეთებს იგი საზოგადოების კეთილდღეობისთვის. რელიგიაც ხომ იმისთვის არსებობს რომ ჩვენი, ადამიანების, ცხოვრება უკეთესი გახდეს. მაგრამ საზოგადოების კეთილდღეობაც არ შეიძლება რომ აბსოლიტურად რელიგიურობის საზომი იყოს (ალბათ უფრო მისი ერთ-ერთი კომპონენტია), რადგან ადამიანმა შეიძლება ის გამოიყენოს საკუთარი სახელის მოსახვეჭად, როგორც ეს მოხდა მამა სერგის შემთხვევაში. ის ზრუნავდა ხალხზე და კურნავდა მათ, მაგრამ რეალურად მხოლოდ საკუთარ წარმატებაზე ფიქრობდა. სამუელ ბატლერის აზრით, ადამიანის არსებობისთვის საჭიროა, რომ იგი ცოტათი მაინც იყოს რელიგიური. მეც ვეთანხმები აღნიშნულ მოსაზრებას, რადგან ადამიანს თუ საერთოდ არაფრის სწამს რთულია, რომ მან სწორად იცხოვროს.

      რელიგიური ტოლერანტობა და თავისუფლება-ერთ-ერთი ყველაზე აუცილებელი და საჭირო რამ ცხოვრებაში. როგორც უკვე აღვნიშნე, რელიგია არის ისეთი რამ, რაც ყველას თავისებურად და განსხვავებულად ესმის. ყველა ადამიანს თავისებური ღმერთი ჰყავს და შესაბამისად ამ საკითხში ჭეშმარიტებაზე დავა ალბათ სრულიად უსაფუძვლოა. შესაბამისად, უთანხმოება ზემოთ მოცემულ საკითხში შეიძლება, რომ საკმაოდ მწვავე გახდეს და ომშიც კი გადაიზარდოს. რელიგიური ტოლერანტობა კი იძლევა იმის საშუალებას, რომ მშვიდობამ დაისადგუროს მსოფლიოში. თავად ტერმინში კი, ჩემი აზრით, იგულისხმება, რომ პატივი სცე ადამიანის ნებისმიერ არჩევანს და გადაწყვეტილებას, რომელიც ჩვენი მოსაზრებისაგან განსხვავებულია და რელიგიური თავისუფლება მიანიჭო ამა თუ იმ პიროვნებას. საკუთრივ ტერმინში რელიგიური თავისუფლება, ჩემი აზრით, იგულისხმება მიანიჭო ადამიანს თავისუფალი არჩევანის უფლება, რომ სწამდეს მას იმ ღმერთის, როგორიც მის წარმოდგენაში არსებობს და არ მოახდინო ამ პიროვნების დისკრიმინაცია, შევიწროვება და ა.შ.რელიგიური ნიშნით.