16 აპრილი

      დღეს თავს გაცილებით უკეთ ვგრძნობ, თუმცა ჯერ კიდევ ვბრაზობ იმაზე, ხალხი რომ დამცინოდა და მასხრად მიგდებდა.

      უფრო ჭკვიანი რომ გავხდები, ორჯერ უფრო მაღალი IQ რომ მექნება, ვიდრე ახლა მაქვს, იქნებ ხალხს მოვეწონო და დამიმეგობრდნენ.

      IQ რა არის, ჯერ კარგად არ ვიცი. პროფესორმა ნიმურმა თქვა, რომ ეს იმის საზომია, რამდენად გონიერია ადამიანი - ისე ზომავს გონიერებას, როგორც აფთიაქის სასწორი - წონას. მაგრამ ექიმი სტრაუსი შეეკამათა და თქვა, რომ IQ ინტელექტს სულაც არ "წონის". მისი თქმით, IQ იმას გვიჩვენებს, თუ რამდენად გონიერი შეუძლია ადამიანს გახდეს - ისევე, როგორც საწყაოზე მითითებული ციფრები, რომლებიც მიუთითებს, რომ საწყაო ჯერ კიდევ არ არის პირამდე სავსე და მისი შევსება კიდევ შესაძლებელია.

      ბერტ სელდენს რომ ვკითხე, რომელიც ინტელექტის ტესტებს მიტარებს და ელჯერნონთან მუშაობს, მითხრა - ზოგიერთი მოსაზრების თანახმად, შეგვიძლია ვთქვათ, რომ ორივე ცდებაო. იმას თუ დავუჯერებთ, რასაც ახლა ვკითხულობ, IQ უამრავ სხვა რამეს ზომავს, მათ შორის, ახლახან დასწავლილ რამეებსად და საერთოდაც, IQ სულაც არ არის ინტელექტის კარგი საზომიო.

      ამიტომ ჯერ კიდევ ვერ გავიგე, რა არის ეს IQ. ყველა სხვადასხვანაირად მიხსნის. ჩემი IQ ახლა 100-ს უტოლდება და მალე 150-ზე მაღალი იქნება, მაგრამ ჩემი რაღაცეებით "შევსება" კიდევ დასჭირდებათ. არ მინდოდა მათთვის მეთქვა,მაგრამ ვერ ვხვდები -თუ არ იციან, რა არის და სად არის მოთავსებული ეს IQ, საიდან იციან, რამდენი მაქვს?

      პროფესორმა ნიმურმა თქვა, რომ ზეგ რორშახის ტესტი უნდა გავიარო. ნეტავ ეგ რაღაა.

იხილეთ:

  •   21 ნოემბერი