რუსეთში ქართველი მეფეების სამშობლოში გადმოსვენების საკითხზე მომუშავე სპეციალური კომისია ამოქმედდა 19/12/12 13:20 რუსეთში ქართველი მეფეების ვახტანგ VI-ს და თეიმურაზ II-ს საქართველოში გადმოსვენების საკითხზე მომუშავე სპეციალურმა კომისიამ დაიწყო მუშაობა. როგორც გაზეთ "Известия"-ს მოსკოვის საპატრიარქოს საგარეო ურთიერთობების განყოფილების ხელმძღვანელის მოადგილემ ნიკოლაი ბალაშოვმა განუცხადა, კომისია ახლახანს ამოქმედდა და 13 დეკემბერს პირველი სხდომა გამართა. მისივე თქმით, საკითხის გადაწყვეტას ისტორიული და არქეოლოგიური მასალების დიდი რაოდენობის შესწავლა დასჭირდება. "აუცილებელია, ამ საკითხში სრული სიცხადე შევიტანოთ და ქართველი მეფეების ნება შევიტყოთ", - განაცხადა ბალაშოვმა და იქვე დასძინა, რომ "პირველივე სხდომის შემდეგ იმის თქმა, რომ საკითხი გადაწყვეტილია, ნაადრევია". შეგახსენებთ, რომ ქართველი მეფეების რუსეთიდან საქართველოში გადმოსვენებაზე საუბარი რამდენიმე ათეული წელია, უშედეგოდ მიმდინარეობს.