2013 წლის 7 ნოემბერს მოსკოვისა და სრულიად რუსეთის პატრიარქ კირილესა და სრულიად საქართველოს კათოლიკოს-პატრიარქ ილია II-ის ლოცვა-კურთხევით მოსკოვის სასულიერო აკადემიაში შედგა შეხვედრა,სადაც რუსეთის მართლმადიდებელი ეკლესიის სასწავლო კომიტეტისა და მოსკოვის სასულიერო სასწავლებლების თავმჯდომარემ, ვერეის მთავარეპისკოპოსმა ევგენიმ და თბილისის სასულიერო აკადემიისა და სემინარიის რექტორმა პროტოპრესვიტერმა გიორგი ზვიადაძემ ხელი მოაწერეს ხელშეკრულებას ურთიერთთანამშრომლობის შესახებ.

საქართველოს დელეგაციაში შედიოდნენ თბილისის სასულიერო აკადემიისა და სემინარიის გამომცემლობის დირექტორი ნინო მელიქიშვილი და რექტორის თანაშემწე მართლმადიდებლურ სასწავლებლებთან ურთიერთობის საკითხებში ლალი ჩუხუა.

მოლაპარაკების მიზანი იყო აკადემიებს შორის შეიქმნას ურთიერთსარგებლიანი პირობები, მოხდეს გამოცდილებათა გაზიარება, ტრადიციების,ღვთისმეტყველებისა და ადგილობრივი მართლმადიდებელი ეკლესიის სწავლების გაცნობა.

მამა გიორგი დამსწრეებს კათოლიკოს-პატრიარქი ილია II-ის სახელით მიესალმა და თბილისის სასულიერო აკადემიის ისტორიასა და მის დღევანდელ მდგომარეობაზე ისაუბრა.მან მოსკოვის სასულიერო აკადემიას წმინდა დიდმოწამე გიორგის ხატი და გამომცემლობის ნაწილი გადასცა,რომელიც თბილისის სასულიერო აკადემიაში მომზადდა. 
თავის მხრივ მთავარეპისკოპოსმა ევგენიმ საქართველოდან ჩასულ სტუმრებს საიუბილეო ნაშრომი "მოსკოვის სასულიერო აკადემიის ისტორია", საღვთისმეტყველო უწყებანი და ხელოვნების შესახებ წიგნები გადასცა.