პატრიარქის საიუბილეო თარიღებთან დაკავშირებით თბილისში ბულგარეთის პატრიარქის მოსაყდრე კირილი ჩამობრძანდა. 
საპატიო სტუმარი თბილისის აეროპორტში თანმხლებ პირებთან ერთად ჩარტერული რეისით ჩამოფრინდა. ბულგარეთის პატრიარქის მოსაყდრეს აეროპორტში წმინდა სინოდის წევრები და მღვდელმთავრები დახვდნენ. 
ვიზიტთან დაკავშირებით მღვდელმთავარმა კირილმა ჟურნალისტებისათვის მცირე კომენტარი გააკეთა. ბულგარეთის პატრიარქის მოსაყდრის განცხადებით, იგი მადლობელია, რომ კიდევ ერთხელ იმყოფება "ღვთივკურთხეულ ქართულ მიწაზე". მან აღნიშნა, რომ ქართველებსა და ბულგარელებს ერთი რწმენა – მართლმადიდებლობა აკავშირებთ. 
მღვდელმთავარ კირილის განცხადებით, 30 წლის წინ იგი იმყოფებოდა საქართველოში და მონაწილეობდა სრულიად საქართველოს კათოლიკოს-პატრიარქის 50 წლის იუბილესთან დაკავშირებულ ღონისძიებაში და ბედნიერია, რომ კიდევ ერთხელ მიეცა შესაძლებლობა საიუბილეო ღონისძიებებს დაესწროს.
მისივე შეფასებით, ბულგარელი და ქართველი ხალხის და ეკლესიის ურთიერთობები ძალიან ღრმაა. მან ისაუბრა ილია მეორის შესახებაც, კერძოდ, ბულგარეთის პატრიარქის მოსაყდრემ აღნიშნა, რომ ილია მეორე ბევრს აკეთებს მორწმუნე ქართველი ერისათვის, "იგი ნამდვილად კეთილი მწყემსია, რომელიც ზრუნავს თავის სამწყსოზე". მღვდელმთავარმა კირილმა ჯანმრთელობა და დიდხანს მოღვაწეობა უსურვა უწმინდესს.
გამთენიისას კი საქართველოში ჩამობრძანდება სერბეთის მართლმადიდებელი ეკლესიის პატრიარქი, უწმინდესი ირინეოსი. ხვალვე ელოდებიან სხვადასხვა მართლმადიდებელი ეკლესიის დელეგაციებს და მღვდელმთავრებს. ასევე, ხვალ, 12.00 საათზე საპატრიარქოში დაგეგმილია მიღება.