როგორც ცნობილია, ადამიანს გააჩნია გარშემო არსებული სფეროები, რომელთა დარღვევის მიმართ იგი ძალზე სენსიტიურია. ადამიანის ინტიმური სივრცე 45 სანტიმეტრამდე ვრცელდება, რომლის დარღვევის შემთხვევაში, იგი დისკომფორტს განიცდის. ადამიანის ინტიმური სივრცე განსაკუთრებით ხშირად მუნიციპალურ ტრანსპორტში ირღვევა. შესაბამისად ყველა ადამიანი ცდილობს, ტრანსპორტში ის ადგილი დაიკავოს, სადაც ნაკლები ხალხია.

      თბილისის მეტროპოლიტენის უმეტეს სადგურში სვეტებია განლაგებული. ადამიანები ამ სვეტებს საზღვრებად აღიქვამენ. ყოველ დღე მიწევს მეტროპოლიტენით სარგებლობა, შესაბამისად, ყოველ დღე ვაკვირდები ადამიანთა ქცევას მატარებლის მოლოდინში. სვეტებს შორის მხოლოდ ორ-ორი ადამიანი დგება. ესეც სწორედ ადამიანის პირადი სივრციდან გამომდინარეობს, რომელიც 1,2 მ-მდე ვრცელდება. ისინი ერიდებიან ამ მანძილის შეზღუდვას. თუ ბაქანზე ყველა სვეტი ორ-ორი ადამიანითაა დაკავებული და მესამე ვეღარ "ეტევა", იგი იკავებს ორ ადამიანს შორის მანძილის შუა ნაწილს, მხოლოდ არა მათ გვერდზე, არამედ მათ უკან. დასკვნის სახით შეგვიძლია ვთქვათ, რომ ადამიანი მაქსიმალურად ცდილობს, რომ შეინარჩუნოს პირადი და ინტიმური სივრცეები.