უჩვეულო სიწყნარით დაიწყო ახალი კვირა, მძიმე ორშაბათი არ გამოვიდა ალბათ ან ზაფხულია და ყველამ დასასვენებელ ადგილებს მიაშრა, ერთი კია - ზღვაზე ამინდობაა - მეტიც, შტორმის გამო ცურვა აკრძალულია. საქმიან სამყაროში დარჩენილებს კი არჩევნებისთვის ფიქრი ამ დროიდანვე უწევთ, ასევე რამდენიმე რიცხვებიანი ნიუსი, ივნისის ვრცელზე-ვრცელი თვე და ანაკლიის პორტის ამერიკული მენეჯმენტი.

საქართველოს და მსოფლიოს ამბები / 5 აგვისტო, 2019

      რიცხვებიანი ნიუსები - ივლისში საქართველოში 1,099,474 საერთაშორისო მოგზაურის ვიზიტი შედგა, რაც გასული წლის მაჩვენებელს 5.8%-ით აღემატება. ღვინის ექსპორტი 4%-ით, ექსპორტით მიღებული შემოსავალი კი 6%-ით გაიზარდა. ივლისში რუსეთიდან საქართველოში ტურისტული ვიზიტები 14 %-ით შემცირდა. 7 თვეში საქართველოს 5 მილიონამდე საერთაშორისო მოგზაური ეწვია, ყველაზე მეტი საერთაშორისო ვიზიტორების ვიზიტი რუსეთიდან განხორციელდა. მარიამ ქვრივიშვილი - ტურისტთა რაოდენობის ზრდის ტემპის შემცირება იწვევს შემოსავლების კლებას, რაც ყველაზე მწვავედ ისახება მოსახლეობაზე.

      პატრიარქის ქადაგება - დეკანოზი ანდრია ჯაღმაიძე - საიდან ჩნდება ასეთი აგრესია პატრიარქის მიმართ? - პატრიარქის ქადაგებაზე აგრესია, პირველი არ არის აბორტის მომხრე ადამიანებისაგან. სრულიად საქართველოს კათოლიკოს- პატრიარქმა 4 აგვისტოს ქრისტიანებს მარიამ მაგდალინელის დღესასწაული მიულოცა და დედის როლზე იქადაგა. „ჩვენ ვცხოვრობთ რთულ დროს, მრავალი შემთხვევაა, როცა დედა ტოვებს ოჯახს და მიდის სამსახურში, სამსახური საჭიროა, მაგრამ პირველი შვილების აღზრდაა.

      გრძელი ივნისი - ელენე ხოშტარია 20 ივნისის მოვლენებისას დაკავებულებზე - ისინი ხელისუფლების მძევლები არიან - „ქართულ ოცნებას“ სჭირდება, რომ დათხრილი თვალები მოგონილი ჯგუფური ძალადობით გადაფაროს. ელენე ხოშტარია 20-21 ივნისს განვითარებულ მოვლენებთან დაკავშირებით დაკავებული 10 ადამიანის მოსანახულებლად გლდანის ციხეში შევიდა. 20-21 ივნისის მოვლენებთან დაკავშირებით დაკავებული ბესიკ თამლიანის დედა აცხადებს, რომ შვილთან კომუნიკაცია შეზღუდული აქვს. მალხაზ მაჩალიკაშვილი 20 ივნისის მოვლენების საქმეზე დაკავებულ ძმისშვილზე - ჰუსეინთან კომუნიკაცია შეზღუდული მაქვს, არ ვიცი, რა მდგომარეობაშია. გიგა მაქარაშვილი - შს მინისტრის გადადგომის მოთხოვნით მიმდინარე აქციების მთავარი თარიღი 20 სექტემბერი იქნება - „ქუდზე კაცს დავუძახებთ“.

      მომავალი წლის არჩევნები - თადარიგი - ეკა ბესელია - 2020 წლის არჩევნები იქნება ყველაზე პრინციპული არჩევნები, რომელიც 2012 წლის შემდეგ ჩატარებულა. ანრი ოხანაშვილი - საარჩევნო ცვლილებები მმართველი გუნდისთვის ნიშნავს საკუთარ უპირატესობებზე უარის თქმას. მმართველი გუნდის მიერ წარმოდგენილი პროექტით, პარტიებს საკუთარი საეთერო დროის ერთმანეთისთვის გადაცემა აეკრძალებათ. თინა ბოკუჩავა - ხელისუფლება ყოველთვის სწორედ საარჩევნო ბლოკების გამოყენებით იცვლებოდა და სწორედ ამიტომ სურს ივანიშვილს ამის აკრძალვა. „განვითარებისა და დემოკრატიის ცენტრის” აღმასრულებელი დირექტორი - პარტიებს უნდა ჰქონდეთ შესაძლებლობა, რომ იარსებონ. ირაკლი კობახიძე საარჩევნო კანონმდებლობის რეფორმის საკითხზე ცვლილებათა პროექტზე - ჩამოყალიბდება სამართლიანი, ძალიან სწორი თამაშის წესები. "გირჩი" 18 წლამდე პირთა არჩევნებში მონაწილეობის ინიციატივით გამოდის. პარტიას არჩევნებში მონაწილეობა მხოლოდ 5000 ხელმოწერის შეგროვების შემთხვევაში შეეძლება. ოთარ კახიძე - „ევროპული საქართველო“ პროპორციულ სისტემაზე გადასვლას მხარს დაუჭერს, მიუხედავად იმისა, რომ გვაქვს წინადადებები ცვლილებების მეტად დახვეწისთვის. ირაკლი კობახიძე - ბლოკი ხელს უშლის საქართველოში პარტიული სისტემის ჩამოყალიბებას, აყალიბებს ძალიან მახინჯ სურათს. გრძელვადიან პერსპექტივაში, კონსტიტუციაში 5%-იანი საარჩევნო ბარიერია ასახული, რაც შეეხება ნულოვან ბარიერს, ეს არის ერთჯერადი. ხათუნა ლაგაზიძე - საარჩევნო რეფორმის საკითხზე მმართველი გუნდის შემოთავაზებები არის დღემდე არსებულ შემოთავაზებებზე უკეთესი.

      ხორავას სხდომები - ადვოკატი - მიხეილ კალანდიას საზოგადოებასთან დასამალი არაფერი აქვს და მისი სურვილია, სასამართლო სხდომები გაიხსნას.

      ანაკლია - „ანაკლიის კონსორციუმის“ სამეთვალყურეო საბჭოს თავმჯდომარის მოვალეობას საქართველოში აშშ-ს სავაჭრო პალატის პრეზიდენტი მაიკლ ქაუგილი შეასრულებს. მამუკა ხაზარაძის განცხადებით, ის და ბადრი ჯაფარიძე თავიანთ აქციებს „ანაკლიის კონსორციუმში“ სამართავად გადასცემენ საერთაშორისო სატრასტო ფონდს, ვიდრე არ გაქარწყლდება მათ წინააღმდეგ წარდგენილი უსაფუძვლო ბრალდებები. გია ხუხაშვილი - ვფიქრობ, ამერიკელების ჩართვის შემდეგ, ხელისუფლებას ძალიან გაუჭირდება ანაკლიის პორტის საბოტირება.