პირველი პროფესიონალი კომპოზიტორი ქუთაისთან ახლოს, სოფ. ბანოჯაში, სასულიერო პირის ოჯახში დაიბადა. ძალიან ადრე აღეძრა მუსიკისადმი მისწრაფება.

      ქუთაისშივე სწავლის დროს გაიცნო სანოტო ანბანი; გატაცებით იწერდა ხალხურ სიმღერებს. მან პირველმა გადაიღო ნოტებზე დღეს ყველასათვის ცნობილი სვანური სიმღერა «ლილე» და სხვა რაჭულ-სვანური ხალხური სიმღერები. ქუთაისური ქალაქური მუსიკალური ფოლკლორი ბავშვობიდანვე მთლიანად აითვისა. ეს მელოდიები შესანიშნავად გამოიყენა რომანსებისათვის - «ოდესაც გიცქერ», «შენ გეტრფი მარად», «ნანა» და სხვა.

      ოცი წლისამ შექმნა მომღერალთა მცირერიცხოვანი გუნდი და 1882 წელს კონცერტების გამართვა დაიწყო.

      მცირე ხნით თბილისის საოპერო სცენაზე მღეროდა, ხოლო შემდეგ, რამდენსამე წელს, ლადო აღნიაშვილის თაოსნობით დაარსებული პირველი პროფესიონალური გუნდის დირიჟორი იყო.

      მალე მუსიკალური ცოდნის გასაღრმავებლად პეტერბურგს გაემგზავრა. იქ, კონსერვატორიაში, ხანგრძლივად ეუფლებოდა მუსიკას ცნობილ კომპოზიტორ ნ. რიმსკი-კორსაკოვთან; ერთდროულად სწავლობდა აგრეთვე ვ. სამუსის სიმღერის კლასშიც. რიმსკი-კორსაკოვის წაქეზებით შეუდგა ქართული ოპერის წერას. თემად აკაკი წერეთლის ცნობილი დრამატული პოემა «თამარ ცბიერი» აირჩია. ამ ოპერის ერთი მოქმედების საჯარო მოსმენა- განხილვა პეტერბურგშივე მოეწყო 1897 წელს. მუსიკოსებმა და პეტერბურგში მცხოვრებმა ქართველებმა ოპერის ნაწყვეტები - არიები, დუეტები, ტრიოები - დადებითად შეაფასეს. დიდხანს წერდა ოპერას. ოცი წლის შემდეგ სამშობლოში გადმოსახლდა, აქაც განაგრძობდა ოპერაზე მუშაობას. ბოლოს 1926 წლის 16 აპრილს, თბილისის ოპერისა და ბალეტის თეატრში ალექსანდრე წუწუნავას რეჟისორობითა და სტოლერმანის დირიჟორობით დაიდგა მელიტონ ბალანჩივაძის სამმოქმედებიანი ოპერა «თამარ ცბიერი», რომელსაც შემდეგ «დარეჯან ცბიერი» შეერქვა. ამ უკვდავი ოპერის არიები, დუეტები და ტრიოები დღესაც წარმატებით სრულდება.

      მან მშობლიურ ქუთაისში დააარსა დასავლეთ საქართველოში პირველი მუსიკალური სკოლა, სადაც მრავალი მუსიკოსი და მომღერალი აღზარდა. ეწეოდა საზოგადო მოღვაწეობასაც. კარგა ხანს მუშაობდა განათლების სამინისტროს მუსიკალური განყოფილების გამგედ; საგუნდო ოლიმპიადა-შეჯიბრებების ჟიურის თავჯდომარე და წევრი იყო.

      ხანგრძლივი და ნაყოფიერი მუშაობისათვის გაუმართეს იუბილე და რესპუბლიკის სახალხო არტისტის საპატიო წოდება მიანიჭეს. დაჯილდოებული იყო საპატიო ნიშნის ორდენით. დაკრძალულია ქუთაისში.

"ფონდი ქართული გალობა"