პლატონი, ძუკუ ლოლუას ერთერთი ნიჭიერი მოწაფეთაგანი იყო. ცოდნის გადაცემის დიდი უნარი გააჩნდა. ოცი წლისა იყო, როცა ოჩამჩირის გუნდის ხელმძღვანელობა იკისრა; საქართველოს ყველა კუთხის სიმღერას ასრულებდა.

      გასაბჭოების პირველსავე წელს აფხაზეთის მთავრობის მეთაურმა ნესტორ ლაკობამ მიიწვია აფხაზეთის სიმღერისა და ცეკვის სახელმწიფო ანსამბლის ხელმძღვანელად. დიდი მონდომებით გააჩაღა ანსამბლში მუშაობა.

      1934 წელს მესამე რესპუბლიკურ ოლიმპიადაზე თბილისში მესამე დღის ყურადღების ცენტრში აფხაზეთის გუნდი მოექცა. აღინიშნა გუნდის რეპერტუარის თავისებურება, დახვეწილი შესრულება და განსაკუთრებით გამოიყო ცეკვა «შარათინ». ანსამბლი პირველი ხარისხის სიგელით დაჯილდოვდა.

      ანსამბლმა 1936 წელს ივნისის ბოლოს კონცერტები გამართა თბილისის თეატრებსა და ესტრადებზე, რამაც წარუშლელი შტაბეჭდილება დასტოვა მაყურებლებზე.

      საქართველოს ხალხური შემოქმედების მეოთხე რესპუბლიკურ ოლიმპიადაზე 1937 წელს აფხაზეთის ასსრ სიმღერისა და ცეკვის ანსამბლი კონკურსგარეშე მონაწილეობს და მაღალ შეფასებას იმსახურებს, როგორც პროფესიული ერთეული. განსაკუთრებით აღინიშნა ოთხი წლის ბავშვის არსენ ჭელიძის მიერ შესრულებული «ბაღდადური» და «ლეკური».

      პლატონ ფანცულაიამ შექმნა «აფხაზური ოდოია», ანსამბლი ასრულებდა მეგრულ «ხუჯიში ოსხაპუეს», სვანურს, რაჭულ «ქვედრულას».

      აფხაზეთის ხელოვნებაში პლატონ ფანცულაიამ თვალსაჩინო წვლილი შეიტანა აფხაზური ფოლკლორის შეკრებითა და საბჭოთა კავშირის მშრომელებისათვის გაცნობით.

      სამწუხაროდ ადრე დასრულდა მისი მოღვაწეობა; ხალხის მტრებმა არც მას დააცალეს ხალხის საკეთილდღეოდ მუშაობა.

"ფონდი ქართული გალობა"