თანამედროვე უნივერსიტეტებში სტუდენტები, რომლებიც წერენ საკურსო, სადიპლომო და სადისერტაციო ნაშრომებს, მუშაობენ ელექტრონული ტექნოლოგიების გამოყენებით, რაც წარმოუდგენელი იყო 1937 წელს, როდესაც ქეით ლ. თურაბიანმა, ჩიკაგოს უნივერსიტეტის დისერტაციების მდივანმა, შექმნა სახელმძღვანელო პრინციპების კრებული სტუდენტი ავტორებისთვის. ინტერნეტ-რესურსების ხელმისაწვდომობამ და ტექსტების რედაქტირების პროგრამებმა შეცვალა სტუდენტების მიერ კვლევის წარმოებისა და შედეგების წარდგენის მეთოდები. მაგრამ ამ ტექნოლოგიებს არ შეუცვლია ავტორის ძირითადი ამოცანა: კარგად დაგეგმილი კვლევის ჩატარება, შედეგების მკაფიოდ და აკურატულად აღწერა და, ამავდროულად, ნაშრომებში წყაროების მითითების, სტილისა და ფორმატის აკადემიური სტანდარტების დაცვა.

     მოცემულ, მეშვიდე რედაქციაში უეინ ს. ბუთმა, გრეგორი ჯ. კოლომმა და ჯოზეფ მ. უილიამსმა განავრცეს წიგნის მასშტაბები. ახალი I ნაწილი, "კვლევა და წერა: დაგეგმვიდან შექმნამდე", ადაპტირებულია მათი "კვლევის ხელოვნების" მიხედვით (ჩიკაგოს უნივერსიტეტის გამომცემლობა, ჩიკაგო, 2003წ.). ამ ნაწილში წარმოდგენილია კვლევის პროცესის წარმართვისა და კვლევის ანგარიშების მომზადების დეტალური ინსტრუქციები; ეს თემა აქამდე არ ყოფილა ჩართული ამ სახელმძღვანელოში. თუმცა, იგი გამოყენებული ლიტერატურის მითითების, წერის სტილისა და ნაშრომების მომზადების ტექნიკური საკითხების განუყოფელი ნაწილია. განხილულ თემებს შორისაა კვლევის ხასიათი, წყაროების მოძიება და მათზე მუშაობა, ჩანაწერების გაკეთება, არგუმენტის ჩამოყალიბება, სამუშაო ვარიანტის მომზადება-რედაქტირება და ფაქტების წარმოდგენა ცხრილებისა და ციფრების სახით. აგრეთვე, აქვეა განხილული კვლევის ალტერნატიულ ფორუმებზე წარმოდგენის გზები. ამ ნაწილში ავტორები უშუალო, კოლეგიური ტონით წერენ, რათა მკითხველი დააინტერესონ ამ კომპლექსური საკითხით. მისი წაკითხვა სასარგებლო იქნება იმ სტუდენტებისთვის, რომლებიც კვლევით პროექტებს ყველა დონეზე ახორციელებენ, სამეცნიერო ნაშრომებზე მომუშავე მკვლევარებს კი შეუძლიათ გამოტოვონ I-IV თავები.

     წიგნის დანარჩენ ნაწილში განხილულია იგივე საკითხები, რომლებიც წინა რედაქციებში იყო წარმოდგენილი. თუმცა, წიგნი მნიშვნელოვნად არის შეცვლილი და ასახავს "ჩიკაგოს სტილის" სახელმძღვანელოს მე-15 რედაქციაში (2003) წარმოდგენილ რეკომენდაციებს. ეს რეკომენდაციები ითვალისწინებს ზეგავლენას, რომელსაც თანამედროვე ტექნოლოგიები ახდენს სტუდენტის მიერ ნაშრომზე მუშაობის ყველა ასპექტზე. ასევე, წარმოდგენილია განახლებული მაგალითები და სახელმძღვანელო უფრო მარტივად წასაკითხი და მეტად პრაქტიკულია.

იხილეთ:

"სახელმძღვანელო რეფერატების, თეზისების და დისერტაციების ავტორებისათვის"

აქვე იხილეთ, 2011 წლის ელექტრონული გამოცემა:

"სახელმძღვანელო წიგნის, სტატიის, დისერტაციისა და სხვადასხვა აკდემიური ნაშრომების ავტორებისთვის"