ზაფხულის მხიარულება უმეტესწილად გაგრილებასთან ასოცირდება (სიცხეში სამხიარულოც არაფერია). გაგრილების საშუალება კი არის კონდიციონერი, მაგრამ გინახავთ კონდინციონერით ვინმე ერთობოდეს? ანდა მაცივარში წოლით? (დამაცივრებულებს გართობა ნამდვილად არ ელით). გართობის და გაგრილების საერთო გადამკვეთი არის წყალი, ბევრი წყალი. წყალი დასალევად, წყალი დასაბანად, წყალი გასართობად, წყალი საწუწაოდ, წყალი სასრიალოდ და ვინ მოთვლის კიდევ რისთვის არა.

      ოდესღაც, წყალსა და მზეში დიდხანს ყოფნამ ადამიანებს კანის ფერი შეუცვალა, შემდეგ რამდენიმე ადამიანს ეს მოუხდა კიდეც და საბოლოოდ ყველაფერ ამას ჟარგონზე "ზაგარი", ხოლო სალიტერატუროდ - რუჯი დაერქვა. ერთს თუ მოუხდა, მეორემ რა დააშავა? ამიტომ ზაფხული მასობრივი გარუჯვის, გახორბლისფერების, ან ფანატიკოსებისთვის დახრუკვის პერიოდადაც ითვლება, თან ეგეც არ იყოს - როდესაც რუჯი გაქვს ნაგულისხმევია, რომ კარგად დაისვენე სადმე ზღვის კურორტზე. (ქართულ რეალობაში რუჯთან უკვე სახურავი და ლეღვის ნახართან ასოცირდება, მაგრამ იცოდეთ რომ ეს ორი ერთად იგივეა, სხეულზე მჟავა რომ გადაგასხან)

      ვინაიდან ზაფხულმა უკვე კარგად მოიკიდა ფეხი და ინტერნეტ სივრცეც აჭრელდა ფეხების მიღმა ზღვის ტალღების ფოტოებით, გთავაზობთ ჯანსაღი რუჯის მიღების რამდენიმე წესს.

      • პირველ რიგში, ყოველთვის უნდა გახსოვდეთ, რომ გარუჯვა რეკომენდირებულია მხოლოდ გარკვეული დროის მონაკვეთში – ეს არის 9:00_დან 11:00 საათამდე და 16:00-დან 19:00 საათამდე. სხვა პერიოდებში და ასევე ხანგრძლივი გარუჯვისას არსებობს საშიშროება მზის ინსულტისა, ამიტომ კარგი იქნება თუ არაუმეტეს 2 საათი გაჩერდებით პლაჟზე.

      • ლამაზი ფერის მისაღებად, კარგი იქნება თუ ნელ–ნელა მიიღებთ რუჯს, დაიწყეთ 10 წუთით პლაჟზე წოლით და გაზარდეთ თანდათან სანამ 2 საათს არ მიაღწევთ. რა თქმა უნდა, შესაძლებელია სწრაფად გარუჯვაც, მაგრამ დამიჯერეთ, უმჯობესია ბევრი დრო დაგჭირდეთ და მიიღოთ ლამაზი ფერი, ვიდრე ერთ დღეს დაიწვეთ და დამწვრობის შემდეგ 2 კვირა ვეღარ შეძლოთ ზღვაზე გასვლა.

      • კარგი იქნება თუ გარუჯვისას მიიღებთ ბევრ სითხეს - წყალი, წვენი, ნამი ☺

      • გამოიყენეთ დამცავი კრებები სახლიდან გასვლამდე რათა კარგად გაჯერდეს კანში. ისინი მთლიანად ან ნაწილობრივ ბლოკავენ ულტრაიისფერ სხივებს და არ აძლევენ საშუალებას დააზიანონ უჯრედები. ხაზგასმით - სახლიდან გასვლამდე და არა უკვე სანაპიროზე, როდესაც კანი გახურებულია და შემდეგ მათ წასმას აზრი თითქმის არ აქვს, თუ რა თქმა უნდა საპირისპირო სქესის ყურადღების მიქცევას არ ცდილობთ.

      გაითვალისწინეთ, რომ არსებობს სხვადასხვა ტიპის კანი, რომლებიც გარუჯვაზე სხვადასხვანაირად რეაგირებენ:

• ტიპი I – ყოველთვის იწვება, არასოდეს ირუჯება (თეთრი კანი, ღია ფერის თვალები, ჟღალი/ქერა თმა, ჭორფლი)
• ტიპი II – უფრო ხშირად იწვება, იშვიათად ირუჯება. (თეთრი ფერის კანი)
• ტიპი III – შეიძლება დაიწვას, ჩვეულებრივ კარგად ირუჯება(ხორბლისფერი კანი)
• ტიპი IV – არ იწვება, კარგად ირუჯება.(მუქი ფერის კანი)
• ტიპი V – საშუალოდ გამოხატული პიგმენტაცია (ლათინო ამერიკელები, შუა აზიის მცხოვრებნი)
• ტიპი VI – კარგად გამოხატული პიგმენტაცია (შავკანიანი ადამიანები)

კარგ დასვენებას, მხიარულ ზაფხულს და წარმატებულ გარუჯვას გისურვებთ!

იხილეთ:

  • კიდევ უფრო ხარისხიანი გარუჯვა