დაიბადა სამეგრელოში, ხობში. 20 წლის იყო პირველი ნატვრა რომ აუსრულდა და ხალხური, ფოლკლორული სიმღერების ოსტატის რომანოზ შელეგიას გუნდის წევრი გახდა. ორი წელი ხობის გუნდში მუშაობამ დიდი გამოცდილება შესძინა, ლოტბარობაც ისწავლა და სოფელ ინგირის სახერხ ქარხანაში ჩამოაყალიბა მომღერალთა გუნდი, რომელსაც ორი წელიწადი ამეცადინებდა. გუნდმა თავი გამოიჩინა 1932 წელს გამართულ სარაიონთაშორისო ოლიმპიადაზე ზუგდიდში.

      1933-1937 წლებში გაგრის რაიონის მომღერალთა გუნდის ლოტბარია. სოხუმში გამართულ მომღერალთა გუნდების დათვალიერებაზე გაგრის რაიონის გუნდი პირველ ადგილზე გავიდა. 1938 წელს გალის რაიონული ეთნოგრაფიული გუნდის ხელმძღვანელობა მას დაეკისრა. ადრე ამ გუნდს კიწი გეგეჭკორი უძღვებოდა (გუნდში მღეროდა 115 წლის ლუკა შარია). თბილისში მეექვსე რესპუბლიკურ ოლიმპიადაზე გალი კარგი მაჩვენებლებით წარსდგა. ორჯერ იქნა მივლინებული საკლუბო დაწესებულებათა გუნდების ხელმძღვანელების გადასამზადებელ კურსებზე თბილისში.

      1955 - 1958 წლებში ზუგდიდის მტს-ის სიმღერისა და ცეკვის ანსამბლს თავკაცობს. სოფ. რუხში საკოლმეურნეო გუნდს ხელმძღვანელობს, პარალელურად რუხის საშუალო სკოლის სიმღერის წრის ხელმძღვანელიცაა. მაყურებლები გულთბილად ხვდებიან რუხის ანსამბლის მიერ შესრულებულ სიმღერებსა და ცეკვებს.

      1954 წლის 16 დეკემბრის ბრძანებულებით მინიჭებული აქვს აფხაზეთის ასსრ ხელოვნების დამსახურებული მოღვაწის წოდება.

      ბოლო, მეცხრე ოლიმპიადაზე, კვლავ გაიელვა აკაკი ხარებავას ნიჭმა და მონდომებამ.

      აკაკი ხარებავა გარდაიცვალა 1978 წელს მშობლიურ სამეგრელოში.

"ფონდი ქართული გალობა"