სახელოვანი მომღერლების ოჯახიდანაა. მამისა და ძმების კვალს მტკიცედ გაჰყვა. ბავშვობაში მშვენივრად მღეროდა მამის – გიგო ერქომაიშვილის გუნდში.

      მოწიფულობის ხანაში კრიმანჭულიდან ბანზე გადავიდა. მისი ხავერდოვანი ხმა მომხიბვლელად ჟღერდა. 1924 წლიდან ბათ უმის მტვირთავ მუშათა გუნდში მღეროდა, რომელსაც მისი უფროსი ძმა, არტემი, ხელმძღვანელობდა. პირველ რესპუბლიკურ ოლიმპიადაზე 1927 წელს ქუთაისში, ამ გუნდმა პირველობა რომ მოიპოვა, ამაში სათანადო წვლილი ანანიამაც შეიტანა. ასევე გაიმარჯვა გუნდმა მეორე რესპუბლიკურ ოლიმპიადაზე ორი წლის შემდეგ, 1934 წელს ოპერის თეატრში ჩატარებულ მესამე ოლიმპიადაზეც ისმოდა მისი მქუხარე ბანი.

      მოსკოვში 1937 წელს ქართული ხელოვნების პირველ დეკადაზე სხვა გურულ მომღერლებთან ერთად ანანიაც გამოირჩეოდა. დეკადის შემდეგ ხანგრძლივი და ნაყოფიერი მუშაობა ჩაატარა საქართველოს ხალხური სიმღერისა და ცეკვის სახელმწიფო დამსახურებულ ანსამბლში, სადაც იმუშავა 1958 წლამდე; ამ წელს მოსკოვში გამართულ დეკადაზე ხელმეორედ მონაწილე სამოცდაექვსი წლის მოხუცი თავის ხმას ძველებური ძლიერებით აჟღერებს; ამიტომ «საპატიო ნიშნის» ორდენით დააჯილდოვეს. ადრე რესპუბლიკის დამსახურებული არტისტის წოდება მიანიჭეს.

      ომის დროს და მომდევნო წლებში უძღვებოდა რკინიგზის მომღერალთა გუნდს. დიდხანს ასწავლიდა სიმღერას თბილისისი N14 (39) სკოლაში, სადაც ბავშვებს ჩონგურზე დაკვრა და მრავალი ხალხური სიმღერა შეასწავლა. ამ დაუღალავი ხელოვანის ხელმძღვანელობით ბევრი კონცერტია ჩატარებული.

"ფონდი ქართული გალობა"