1928 წელს, სოფელ ლექსურაში, (ლენტეხი, სვანეთი) მეშველიანების ოჯახში დაიბადა მომავალი ლოტბარი და ფოლკლორის უზადო მცოდნე - ჯოკია მეშველიანი. 1947 წელს საშუალო სკოლა დაასრულა, ხოლო 1953 წელს - აგრონომიული ფაკულტეტი და ლენტეხის რაიონის სოფლის მეურნეობის სამმართველოს უფროს აგრონომად დანიშნეს. ჯერ ისევ ახალგაზრდამ მოასწრო ოცდახუთი წელიწადი ხალხის სამსახურში ყოფნა.

      ბავშვობიდანვე დღესასწაულებსა და საღამო-კონცერტებზე ლექსებს კითხულობდა და სიმღერებს ასრულებდა.

      თვრამეტი წლისა იყო, როცა მოსწავლეთა რესპუბლიკურ ოლიმპიადაში მიიღო მონაწილეობა და ჭუნირზე დაკვრის შესანიშნავი ოსტატობა გამოამჟღავნა. ორი წლის შემდეგაც დაუკრა ჭუნირზე მოსწავლეთა რესპუბლიკურ ოლიმპიადაში.

      სტუდენტობის დროს ლენტეხის კულტურის სახლთან არსებულ მომღერალთა გუნდთან ერთად მეექვსე რესპუბლიკურ ოლიმპიადაში მიიღო მანაწილეობა. აქტიური წევრი იყო სასოფლო-სამეურნეო ინსტიტუტის გუნდისა, რომელსაც ნოკო ხურცია ხელმძღვანელობდა.

      უმაღლესი სასწავლებლების ოლიმპიადაზე სოლისტ-მომღერალი ჯოკია მეშველიანი დააჯილდოვეს საპატიო სიგელით.

      ქვემო სვანეთის კულტურის სახლის სიმღერისა და ცეკვის ანსამბლმა (ხელმძღვანელები: მ. ონიანი და ჯ. მეშველიანი, ქორეოგრაფი: ა. გოგიძე) კარგად შეასრულა სვანური სიმღერები მეშვიდე რესპუბლიკურ ოლიმიადაზე.

      1953 წლიდან ლენტეხის რაიონის სიმღერისა და ცეკვის ანსამბლის ხელმძღვანელია. ლენტეხელებმა მერვე ოლიმპიადაზე კარგად შეასრულეს სვანური სიმღერები. ოთხი წლის შემდეგ რაიონულ დათვალიერებაში მონაწილეობისათვის საპატიო სიგელი მოიპოვა, ხოლო ბოლო, მეცხრე ოლიმპიადაზე კვლავ შესანიშნავი მაჩვენებლებით წასდგა.

      1967 წლის 29 ნოემბრის ბრძანებულებით, ჯოკია სანდროს ძე მეშველიანს მიენიჭა საქართველოს სსრ დამსახურებული არტისტის საპატიო წოდება.

      1994 წლის 13 თებერვალს გარდაიცვალა ქართული ფოლკლორის დიდი მოამაგე ჯოკია მეშველიანი.

"ფონდი ქართული გალობა"