წარმოშობით კახელი იყო, სოფელ შილდიდან. ისწავლა ჯერ თელავის სასულიერო სასწავლებელში, შემდეგ გორის საოსტატო სემინარია დაასრულა და 1881 წლიდან თბილისის სათავადაზნაურო სკოლაში მოეწყო მასწავლებლად. ბოლო წლებში დიდმა ილიამ სათავადაზნაურო ბანკში მიიწვია სამუშაოდ.

      ლიტერატორობასაც ეწეოდა. შეადგინა რუსული ენის სახელმძრვანელო "Первый шаг", გამოსცა "ზღაპრების კრებული" და "უბის ლექსიკონი". "ქართული წიგნის გამომცემლობათა ამხანაგობის" ერთ-ერთი დამაარსებელთაგანი იყო. სპარსეთიდან დაბრუნების შემდეგ, სადაც წელიწადნახევარი დაჰყო, შეადგინა და გამოაქვეყნა ნარკვევი "სპარსეთი და იქაური ქართველნი", გამოსცა წიგნი "ქართული ხოროს დაარსება".

      დიდი ენერგიის პატრონი დაბრკოლებებს არ შეუშინდა და საქართველოში პირველად ჩამოაყალიბა პროფესიული გუნდი. გუნდის ხელმძღვანელად იოსებ რატილი მიიწვია; პირველი კონცერტი 1886 წლის 15 ნოემბერს გამართა; მეორე კონცერტი - 26 დეკემებრს.

      ამ ისტორიული მნიშვნელობის მქონე კონცერტებს პრესა გამოეხმაურა. "ივერიამ" აღფრთოვანებით აღნიშნა ეს მოვლენა. "მოვისმინე რატილის ქართული მომღერალთა გუნდი და პირველად ვიგრძნე ქართული ოპერის სურნელებაო", - უთქვამს დიდ ილია ჭავჭავაძეს.

      მომდევნო წლებში კონცერტები როგორც საქართველოში, ისე მის გარეთაც იმართებოდა. ბოლო წლებში გუნდში უმღერიათ ივანე და ზაქარია ფალიაშვილებს, ვანო სარაჯიშვილს, სანდრო კავსაძეს, ნიკო გოცირიძეს; დიმიტრი არაყიშვილს გუნდი უკვე ხელმეორედ ალექსანდრე ბერიძის ლოტბარობით არმავირში მოუსმენია და აღფრთოვანებულა.

      საინტერესოა გუნდის შემადგენლობა; თავდაპირველად მასში 32 მომღერალი იყოწარმოდგენილი. აი, მათი სრული სია:

      პირველი ტენორები: ლეო ცისკარიშვილი, ტატო ფეიქრიშვილი, გიორგი ჩაგუნავა, კორნელი მაღრაძე, ნიკოლოზ ჩახნაშვილი, ილია (ია) კარგარეთელი, ვასო ბაგრატიონი, კოტე დვალი.

      მეორე ტენორები: სერგო მამალაძე, სიკო აღნიაშვილი, გრიგოლ ჭკუასელი, კოტე კუხიანიძე, ალ. მათურელი, როსტომ ჩიკვაიძე, მოლოტოვი.

      პირველი ბანები: სანდრო გოცირიძე, საშა ბერიძე, ბასილაშვილი, მათე იანქოშვილი, მიხ. ავალიანი, მოსე კაპანაძე, სოსო ჩიჯავაძე, ექვთიმე ბურჯანაძე.

      მეორე ბანები: ნიკ. წინამძღვრიშვილი, წიკლაური, ევსევი ბაბილუა, ჩიჩუა, კლიმენტი ჭანტურაია, იოსებ ჭირაქაძე, აპ. გოდერძიშვილი, ლავრენტი მათიკაშვილი, დავით გაგუნოვი.

      ძნელი პირობების გამო, სამწუხაროდ, 1890 წლიდან პირველმა პროფესიულმა ანსამბლმა მუშაობა შეწყვიტა.

"ფონდი ქართული გალობა"