გურიაში იშვიათია ოჯახი, სადაც ოჯახის ერთი წევრი მაინც არ მღეროდეს. ჭანიეთში დაბადებული მიხეილ შავიშვილი ისეთი ოჯახიდანაა, სადაც თითქმის ყველა მღეროდა მამის, გერმანეს, მეთაურობით. ბავშვი თავიდანვე აკრიმანჭულებდა თავის ჯერ კიდევ დაუყენებელ ხმას. თხუთმეტი წლის ასაკიდან ჩაება მხატვრულ თვითმოქმედებაში. ჯერ სკოლის, ხოლო შემდეგ საკოლმეურნეო გუნდის ხელმძღვანელი გახდა. ვარლამ სიმონიშვილის ანსამბლში მოწიფულობის ჟამს კრიმანჭულს აგვირისტებდა. 

      უმაღლესში სწავლის დროს ბათუმში აჭარის სიმღერისა და ცეკვის ანსამბლში (ხელმძღვანელი: არტემ ერქომაიშვილი) მღეროდა. უმაღლესდასრულებული ომში გაიწვიეს. სიმღერა არ შეუწყვეტია. მებრძოლებს ამღერებდა, სიმღერით მიიკვლევდა გზას გამარჯვებისაკენ.

      ომიდან დაბრუნებული მასწავლებლობს, თან სასკოლო გუნდებს ხელმძღვანელობს. ორჯერ იმარჯვებს რაიონულ დათვალიერებაზე.

      1946-1956 წლებში ხელმძღვანელობს ჯერ ჭანიეთის საკოლემურნეო გუნდს, შემდეგ - ნასაკირალის ჩაის საბჭოთა მეურნეობის, ლაითურის ჩაის საბჭოთა მეურნეობის, ბოლოს კი - რაიკოოპკავშირის ანსამბლს და ყველა დათვალიერებაზე ყოველთვის პირველ ადგილზე გამოდის.

      განსაკუთრებით უნდა აღინიშნოს მისი მოღვაწეობა პირველ «შვიდკაცაში». 1957 წელს იგი გვერდში ამოუდგა ჯანსუღ კახიძეს, როგორც რესპუბლიკურ, ისე საკავშირო ახალგაზრდულ ფესტივალებზე ბრწყინვალედ გამოავლინა თავისი ნიჭი და საშემსრულებლო შესაძლებლობანი.

      მომდევნო 1958 წელს მან მახარაძეში ჩამოაყალიბა «შვიდკაცა». იმავე წელს მონაწილეობა მიიღო მოსკოვში ჩატარებულ ლიტერატურისა და ხელოვნების დეკადაზე. აქაც - ბრწყინვალე შედეგები, კარგი შეფასება. ამას მოჰყვა ბრიუსელის მსოფლიო გამოფენა; იქაც - კარგი მიღწევები. შემდეგ - ისევ ქართული კულტურის დღეები მოსკოვში. აქაც - წარმატება. მომდევნო 1959 წელს ქართული მელოდიების კონცერტზე მოსკოვში «შვიდკაცა» შესანიშნავად გამოვიდა. შემდეგ წელს პოლონეთში გამოვიდა და იქაც გამარჯვება მოიპოვა. მერე ისევ სკოლებში იმუშავა. შემდეგ ქაქუთის (აჭარა) საკოლმეურნეო ანსამბლის უხელმძღვანელა. რესპუბლიკურ დათვალიერებებზე კვლავ I ხარისხის ჯილდო მოიპოვა.  

      1964 წელს შედგა მახარაძის «შვიდკაცას» გასტროლები რიგაში. ლატვიელი მსმენელი მოიხიბლა ქართული მელოდიებით.

მოისმინეთ მიშა შავიშვილის გუნდის მიერ შესრულებული ხასანბეგურა:

"ფონდი ქართული გალობა"