ავგუსტუს ოქტავიანეს ზეობის დროს, ხელისუფლებამ გამოსცა ბრძანება აღწერილიყო რომის იმპერიის მოსახლეობა. იმ ხანად პალესტინა რომის ერთ-ერთ პროვინციას წარმოადგენდა და ბრძანების თანახმად, მასაც უწევდა აღწერაში მონაწილეობა. ებრაელებს კი აღწერის თავიანთი მეთოდი ჰქონდათ. ისინი იაკობის, ისრაელის თორმეტი ტომის შთამომავლებს აღწერდნენ მათი ქალაქების მიხედვით. იუდას ტომისგან შობილი დავით მეფის შთამომავლები იყვნენ იოსები და მასზედ დაწინდული ქალწული მარიამი. დავითის ქალაქად "პურის სახლი", ანუ "ბეთლემი" იწოდება. მართალი იოსები და მარადქალწული, მიდგომილი მარიამი, დავითის შთამომვლები იყვნენ და სწორედ ბეთლემისკენ გაემართებიან. როგორც მათეს სახარებაში ვკითხულობთ, წინასწარმეტყველი მოგვითხრობს: "და შენ, ბეთლემ, ქუეყანაჲ ეგე იუდაჲსი, არასადა უმრწემეს ხარ მთავართა შორის იუდაჲსთა, რამეთუ შენგან გამოვიდეს წინამძღუარი, რომელმან დამწყსოს ერი ჩემი ისრაჱლი.[მქ. 5,2] (მთ. 2,6)". ბეთლემში მისულებს ყველა სასტუმრო თუ სხვა ღამის გასათევი სავსე ან დაკეტილი დახვდათ, არავინ შეიფარა წმინდა ოჯახი. ქალაქი შორიახლოს ერთ გამოქვაბულს მიაშურეს, რომელსა უამონდობის ჟამს მწყემსები პირუტყვთა საკვებად და თავსესაფრად იყენებდნენ. სწორედ იქ, დაიბადა ძე ღვთისა, მხსნელი სოფლისა, უფალი ჩვენი იესო ქრისტე. წმინდა წერილი მოგვითხრობს, რომ პირველი ვინც შობის ამბავი შეიტყვეს, მწყემსები იყვნენ, რომელთაც ანგელოზთა გუნდი გამოეცხადა გალობით: "დიდებაჲ მაღალთა შინა ღმერთსა, და ქუეყანასა ზედა მშჳდობაჲ, და კაცთა შორის სათნოებაჲ." (ლკ. 2,14). ანგელოზმა უთხრა მწყემსებს, რომ იშვა მაცხოვარი და მას იპოვიდნენ შეხვეულსა და მწოლარეს ბაგაში.

      ნაწინასწარმეტყველები იყო, რომ უფლის შობის წინა დღეებში, გამოჩნდებოდა ვარსვკლავი აღმოსავლეთით. სწორედ ამ ვარსკვლავს გამოყვნენ მოგვები, რომლებმაც უფლის შობის ამბავი პირველებმა ამცნეს იერუსალიმს. შემდეგ იპოვეს ბაგა და თაყვანი სცეს უფალს, მიართვეს მას ოქრო, ვითარცმა მეფეს, გუნდრუკი, ვითარცა ღმერთს და მური, ვითარცა ადამიანს.

      ქრისტეს შობის დღესასწაული პირველი საუკუნიდან აღინიშნება.

◄ გუშინ | დღეს | ხვალ ►