ფოლკსვაგენის ფონდის მიერ დაფინანსებული პროექტის საქართველოს სახელმწიფო უნივერსიტეტებში ფილოსოფიისა და სოციოლოგიის მიმართულებების ხელშეწყობის პროექტის (2013-2015) ფარგლებში, ბაკურიანში, 15-დან 26 აგვისტოს ჩათვლით, იმართება საზაფხულო სკოლა, რომელიც ეძღვნება თემას:  აღიარებისა და პასუხისმგებლობის პრობლემები გერმანულ იდეალიზმში და მათი გავლენა თანამედროვე სოციალურ თეორიებზე.

საზაფხულო სკოლაში ლექცია-სემინარებს ჩაატარებენ ევროპასა და ამერიკაში მოღვაწე პროფესორები და დოცენტები ფილოსოფიისა და სოციალური თეორიის დარგში: ლუდვიგ ზიპი,  გეორგ ლომანი,  ნიკლაუს ლარგიერი,  იოჰანეს ვაისი, თეო კობუში და შტეფან ციმერმანი.

ლექცია-სემინარებს ჩაატარებენ აგრეთვე თბილისის სახელმწიფო უნივერსიტეტების პროფესორები. საზაფხულო სკოლაში ლექცია-სემინარები ჩატარდება გერმანულ ენაზე, თანმიმდევრული ქართული თარგმანის თანხლებით.

საზაფხულო სკოლაში მონაწილეთა შერჩევა მოხდება  ესეების კონკურსის საფუძველზე. აღნიშნულ კონკურსში მონაწილეობა შეუძლიათ სახელმწიფო უნივერსიტეტების სხვადასხვა საფეხურზე მყოფ სტუდენტებს (ბაკალავრებს, მაგისტრებს,  დოქტორანტებს) ფილოსოფიისა და სოციალურ მეცნიერებათა მიმართულებით.

სტუდენტები, რომლებიც შესარჩევ კონკურსს წარმატებულად გაივლიან, მოიპოვებენ სრულ დაფინანსებას საზაფხულო სკოლაში მონაწილეობისთვის. უპირატესობა მიენიჭებათ სტუდენტებს, რომლებიც ფლობენ გერმანულ, ან/და ინგლისურ ენებს, ვინაიდან საკითხავი მასალა, (გარდა ქართული ენისა), ამ ორ ენაზე იქნება წარმოდგენილი.

შეირჩევა 15 საუკეთესო ესეი და შესაბამისად, დაფინანსდება კონკურსში გამარჯვებული 15 სტუდენტი.

კონკურსში მონაწილეობის მისაღებად, გთხოვთ, ელექტრონულ მისამართზე: summerphilo@gmail.com 15 ივლისამდე გადმოგზავნოთ თქვენი ბიოგრაფია (CV) და ესეი თემაზე: რატომ გსურთ მონაწილეობა მიიღოთ საზაფხულო სკოლაში.

საზაფხულო სკოლის აკადემიურ მხარდაჭერას  უზრუნვალყოფს კასელის (გერმანია) უნივერსიტეტი და ბონის (გერმანია) ფილოსოფიის ინსტიტუტი, ფინანსურ უზრუნველყოფას კი ახორციელებს:
• ფოლკსვაგენის ფონდი (VolkswafenStiftung)
• საქართველოს განათლებისა და მეცნიერების სამინისტრო
• საქართველოს სხვდასხვა რეგიონის უნივერსიტეტები