საქმე მოციქულთა მოგვითხრობს, რომ კორინთოში ჩასულმა პავლე მოციქულმა, გაიცნო და დაიმოწაფა ჰურია აკვილა - "პონტოელი ნათესავით" და მისი მეუღლე პრისკილა. ისინი რომში ცხოვრობდნენ იქამდე, ვიდრე იმპერატორმა კლავდიუსმა (41-54 წწ.) არ გამოსცა ბრძანება, რომელიც ებრაელებს უკრძალავდა დედაქალაქში ცხოვრებას. ამის შემდეგ აკვილა და პრისკილა იძულებულები შეიქმნენ გადასახლებულიყვნენ რომიდან, დამკვიდრდნენ კორინთოში, თუმცა უფლის ნებით მათ სწორედ კორინთოში განეცხადათ ქრისტეს ღმერთი პავლე მოციქულის ბაგეებიდან. პავლე მოცქული და აკვილა ერთი ხელობისანი იყვნენ - მეპარტაკე (მეკარვეები), ამიტომ პავლე მოციქული ღმრთისმოსავ ოჯახთან ცხოვრობდა კორინთოში მოღვაწეობის დროს. პავლეს ხელით ნათელღებული აკვილა და პრისკილა მისი ერთგული მოწაფეები გახდნენ და თან ახლდნენ წმიდანს ეფესოში მოგზაურობისას. როცა მოახლოებული სულთმოფენობის დღესასწაულზე დასასწრებად ნეტარი მოციქული იერუსალიმში გაემგზავრა, თავისი არყოფნისას ეფესოში სახარების სწავლება ღვთისმოყვარე ცოლ-ქმარს მიანდო. სწორედ ამ დროს ჩავიდა ქალაქში "ჰურიაჲ ვინმე, აპოლო სახელით, ალექსანდრიელი ნათესავით". სულით მდუღარე და "სიტყუა-მეცნიერი" მქადაგებელი შესაკრებელსა შორის "ეტყოდა და ასწავებდა ჭეშმარიტად იესუჲსთჳს, და იცოდა ნათლის-ცემაჲ ხოლო იოვანესი". აკვილამ და პრისკილამ შეიტყვეს ამის შესახებ, "მოიყვანეს იგი და უჭეშმარიტესად-რე უთხრეს მას გზაჲ იგი უფლისაჲ" (საქმე, 18, 24-27).

      როდესაც კლავდიუს კესიარი გარდაიცვალა, ებრაელებს რომში ცხოვრების უფლება დაუბრუნეს. წმინდა ცოლ-ქმარიც კვლავ დედაქალაქში გადასახლდა, თუმცა დიდი ხნით არა, რადგან პავლე მოციქულის ხელით აპკვილა ასიის ეპისკოპოსად იქნა დადგეილი. პავლე მოციქული რომაელთა მიმართ ეპისტოლეში წერს: "კითხვაჲ არქუთ პრისკილას და აკვილას, თანა-შემწეთა ჩემთა ქრისტე იესუჲს მიერ, რომელთა - იგი სულისა ჩემისათჳს ქედნი მათნი წარუპყრნეს, რომელთადა არა მე ხოლო მადლიერ ვარ, არამედ ყოველნი ეკლესიანი წარმართთანი, და სახლად-სახლად კრებულნი მათნი" (რომ. 16, 3-5)

      წმინდა აკვილა უშურველად მოღვაწეობდა ასიაში, აქაიასა და ჰერაკლიაში. საღმრთო, სამოციქულო საქმიანობაში პრისკილაც დაუცხრომელად შეეწეოდა. წარმართთა შორის მოღვაწეობამ, ქრისტესვით მარტვილობა არგუნა მათ - წამებით ამოხადეს სული. მათი უხრწნელი ნაწილების უმეტესობა რომშია დაცული.

◄ გუშინ | დღეს | ხვალ ►