დილით ავდექი, პატარა ვარ,

კაკაბეთიდან, ჩემი სახლიდან ვუმზერ მე ტაძარს...

ლოცვით დავდექი¹

და თელეთის²გზას მივუყვები მაღლა და მაღლა...

ვიღლები, მშია და ვჭამ ხის ნაყოფს³ მთა თელეთისას,

მზემ გამაოფლა და იქ, მაღლა, მივადექ ტაძარს,

კარღებულ წიაღს, გაჩერებულ დროს...

წმინდა გიორგის სახელობის კაცთა სალოცავს...

და ახლა ვფიქრობ,

ახლა ვფიქრდები წვეთი წყალუხვი სემინარიის:

მე ამ გზით თურმე მისწავლია გზა-ქრისტე⁴ ტაძრის!

თურმე უნათლავს მექადაგა ღია ზე-კარი⁵

და ხის ნაყოფით ქალწულხისა ქრისტე-ნაყოფი⁶!

მე ამ გზით თურმე მისწავლია გზით⁷ ამაღლება!

ჯვრისმტვირთველობა, გოლგოთაზე შენება ტაძრის⁸!

ახლა ვფიქრდები,

ახლა ვფიქრდები წვეთი წყალუხვი სემინარიის

და მინდა იყოს ჩემი გული მადლიერების!

და მინდა იყოს ჩემი გული საკურთხეველი,

საკურთხეველი ჩემში, ღვთისგან, ცოცხალი ტაძრის⁹!

წმინდა ტრაპეზი უსისხლო მსხვერპლის, ამაღლებულის

და სივრცე, ღვთისგან, ზე-სიხარულის, ზე-სიყვარულის...

მე მინდა ვიყო მოზიარე განკაცებულის

და მოტრფიალე მადლის, მადლის ნეტარებულის!

                                                     09.08.13წ.

                                                  მამუკა თეთრაძე

¹_{კეთილგანზრახვა იყო ლოცვა.}

² _{თელეთის გორას აქვს სამი ასასვლელი: ყანდაურიდან, ვერხვიანიდან და ბადიაურიდან და წვერზეა სალოცავი.}

³ _{შვინდის ხის წითელ ნაყოფს.}

⁴_{„მე ვარ გზაჲ და მე ვარ ჭეშმარიტებაჲ და ცხორებაჲ; არავინ მოვიდეს მამისა, გარნა ჩემ მიერ“(იოან.14,6).}

⁵_{ქრისტე („მე ვარ კარი ცხოვართაჲ“(იოან.10,7)და მის მიერი ნათლობა.}

⁶_{„გიხაროდენ, ხეო (ღვთისმშობელო-მ.თ.) ნაყოფ-ელუარეო, რომლისაგან იზრდებიან მორწმუნენი“ (ღვთისმშობლის დაუჯდომელი).}

⁷ _{გზით - ქრისტეთი.}

⁸_{გოლგოთაზე შენება ტაძრის - ჯვარცმულ ქრისტეში პიროვნების გამომხსნელობითი მდგომარეობა.}

⁹ _{ცოცხალი ტაძრის ( მართლმორწმუნე ადამიანზე, როგორც ტაძარზე იხ. 1 კორ. 3,16-17 და თვითონ განკაცებულ ღმერთზე, როგორც ტაძარზე იხ. იოან. 2, 19-21) წმინდა გული, როგორც ტაძრის წმინდა საკურთხეველი და წმინდა ტრაპეზი; ტრაპეზი, როგორც სავანე უსისხლო მსხვერპლის-ქრისტესი.}