ღამეა ისევ, თან მზეც ანათებს;¹

დღეცაა იცი? წრფელ გულს ანათლებს.²

აღდგომის გზაა სულს რომ ახარებს,

აღდგომის გზაა ხორცს რომ ახარებს.³

ღამეა ისევ, ხორცი იხრწნება!⁴

დღეა სულისა, ახლად ინთება!⁵

ღამეა სულის ვინც არ აენთო,

მაცხოვარ-ცეცხლით ვინც არ ინთება!⁶

ვინც არ ბრიალებს უქმნელი ცეცხლით,

ვინც არ მიიღო ქრისტე გულცეცხლით,

ვინც არ გახედნა ურჩობის ცხენი⁷

და კვლავ აწამებს მაცხოვარს, ცემით!

დღეს საზეიმო დღეა ყველასთვის,

დიდი ნუგეში ღვთისა დედასთვის.

მორწმუნის გული დღეს უფრო ფეთქავს,

აღსდგა სამშობლო⁸ მადლით ნეტართთვის.

დღეს წმინდანები, ცეცხლით ბმულები,⁹

ლოცვით გვანთებენ აღდგომა დღისთვის,

და ჩვენც ვეცადოთ, ვიყოთ ხნულები,

სხივსაწვდომები კაშკაშა მზისთვის!¹⁰

                                        20.04.2014წ.

¹_{წუთისოფელში კაცობრიობა სცოდავს და ამ კუთხით „ღამეა ისევ“, მაგრამ, არიან ისეთი ადამიანებიც, რომლებიც ცდილობენ ღვთისკენ სწრაფვას საქმით მოქმედი სიყვარულით, ანუ „თან მზეც ანათებს“.}

²_{“დღეცაა“ ანუ ამ წუთისოფელში მაცხოვარიცაა და გვეხმარება ცხონების მსურველთ.}

³_{საყოველთაო აღდგომა,მკვდრეთით აღმდგარი მაცხოვრის მსგავსად, ეხება ყველა ადამიანს (მის, როგორც სულს, ასევე სხეულსაც), რადგან -„და ვსწინაწარმეტყუელებდ,ვითარცა მამცნო მე უფალმან.და იქმნა ჴმაჲ,ვსწინაწარმეტყუელებდ რაჲმე,და აჰა,ძრვა და მოიყვანნა ძუალნი,ძუალი ძუალისა მიმართ,თითოეული შენაწევრებისა მიმართ მისისა.და ვიხილე და,აჰა,ზედ და ექმნეს მათ ძარღუნი,დაჴორცნი აღმოსცენდებოდეს და აღმოვიდოდეს მათ ზედა,და გარემოერთხა მათ ზედა ტყავი ზედაკერძო,და სული არა იყო მათ შორის.და თქვა ჩემდამო: წინაწარმეტყუელებდ სულისა ზედა,წინაწარმეტყუელებდ,ძეო კაცისაო,და ვარქუ სულსა: ამათ იტყჳს ადონაჲ უფალი:ოთხთაგან სულთა მოვედინ სული,და მიებერენ მკუდართა ამათ მიმართ და განცოცხლდენ“(ეზეკიელი:37,7-9). „აჰა ესერა საიდუმლოსა გითხრობ თქუენ: ყოველთავე უკუე არა შევისუენოთ, ხოლო ყოველნივე განვახლდეთ მეყსა შინა წამსა თუალისა უკუანაჲსკნელით ამით საყჳრითა, რამეთუ საყჳრსა დაეცეს, და მკუდარნი იგი აღდგენ უხრწნელნი, და ჩუენ განვახლდეთ. რამეთუ ჯერ-არს ხრწნილისა ამის შემოსად უხრწნელებაჲ,და მოკუდავისა ამის შემოსად უკუდავებაჲ. ხოლო რა ჟამს განხრწნადმან ამან შეიმოსოს უხრწნელებაჲ და მოკუდავმან ამან შეიმოსოს უკუდავებაჲ, მაშინ აღესრულოს სიტყუაჲ იგი წერილისაჲ: დაინთქა სიკუდილი ძლევითა“(კორინთელთა: 15,51-54).}

⁴_{ანუ, მიუხედავად მაცხოვრის აღდგომისა, ჯერ საყოველთაო აღდგომა არ დამდგარა და ბუნებრივია, წუთისოფელში,თვით წმინდა ადამიანის სხეულიც იხრწნება და ითესება მიწაში.}

⁵_{აღდგომის დღე,მორწმუნე ადამიანისთვის, არის სასიცოცხლო იმედი და ადამიანი ცდილობს აქვე, წუთისოფელში,სულით განიცადოს ღვთისადმი ტრფიალება, რადგან, მადლმოხვეჭილი იმქვეყნადაც მადლმოხვეჭილი იყოს და საყოველთაო მკვდრეთით აღდგომის დროსაც, როცა თავისსავე სხეულს შეემშვენება.}

⁶_{ანუ, ვისაც მადლის მოხვეჭა არ სურს, ვისაც არ უნდა ღვთის უქმნელი ენერგიით სულდგმულობა და მხოლოდ ამაოებათა ამაოებაში ამაოებს.}

⁷_{ჯიუტი გული ვინც არ დაამდაბლა სინანულით, ღვთისადმი მოსაობით, ლოცვით, ...}

⁸_{მაცხოვარი ამბობს- „მე ვარ გზაჲ და მე ვარ ჭეშმარიტებაჲ და ცხორებაჲ“(იოანე: 14,6) და მისგანაა სამშობლო ზეციური და თვით ისაა, როგორც სამშობლო, ზიარებით ჩვენში, რათა აღვსდგეთ მისით და ვიყოთ მასთან, მორჩილნი, თავმდაბლობით ამაღლებულნი და წმინდანი, და საქმით ამეტყველებულნი ქრისტესმიერ სიყვარულში.}

⁹_{მადლით თანამოფენილნი,თანაშემშვენებულნი, თანაშეთანხმებულნი...}

¹⁰_{ღვთიური მადლის მიმღებნი.}