ხდება ყველაფერი ღმერთის ნებით,

ხელში მისი ხელი მიკავია,

ისევ მიყვარხარო, - ვეფიცები,

ჰოდა, ერთად ყოფნა გვიხარია.

ის კი ცახცახებს და მეხუტება...

წამიც აღარ გვინდა სიშორისა.

თანაც სული ისე გვეხუთება,

თითქოს ბეჭედს ვჩუქნი ნიშნობისას.

ახლა არ იქნება შეჩერება,

უნდა იტრიალო დედამიწავ.

მიყვარს ეს გოგო და მეჩემება,

ჩემთვის გააჩინა დედამისმა.

მინდა ხელი მაგრად ჩავკიდო და

მთელი მზისქვეშეთი მოვიაროთ.

დღემდე მის გარეშე რა მინდოდა,-

ჩემთვის ვჩურჩულებ და ვბოდიალობ...

დღეს რომ სიყვარული გავაერთეთ,

მგონი მთელ სამყაროს უხარია.

მწამდა ეს გოგო და გავაღმერთე,

ჰოდა, ახლა ჩემთან უფალია!

დათო ახლოური