მე ერთი მიყვარს – იგი ღმერთია, ერთი ვიწამე – ღმერთი ჯვარცმული

ერთია ქვეყნად, ვინ შემეწია, წმინდა ძლება სახელგანთქმული

მე მას ვუბოძებ ქვეყნად ბედის კარს, რა სიამებას შეიცნობს გული

მას გავუყვები ღვთისებრ მხარი–მხარს, რას მიძღვნის სული – ცად აღმართული

მე, მას მივმართავ, რას ღმერთი მომცემს, რა გზას მარგუნებს სული მზიადი

მე მას გავყვები, რა არად დამცემს, ღმერთის სიწმინდის ძალი დიადი

ადამიანო, მხოლოდ ღმერთს ენდე, მას შეავედრე ხსნა და დიდება

ისე იცხოვრე, მის სულს ისმენდე, არ გწამდეს ქვეყნის ავლა–დიდება

ქვეყანა ბნელით მოსილი ყველგან, მარად გარგუნებს ისარს ცოდვიანს

ღმერთის გზა არას მოითხოვს შენგან, ერთს შეგთხოვს, ასცდე ცოდვას სევდიანს

კაცთ სიყვარული ზეცის პირმშოა, სულით მოსული ღმერთის გულიდან

ღმერთი რას გამცნობს–მადლი სითბოა მომავლის მხრიდან, თუ წარსულიდან

ცხოვრება გეტყვის, გული ვის არგო, ვის გაუმხილო სულის იარა

ვინც შენი გრძნობით ოქროს ხე დარგო, ვინც შენი ჭირი გაიზიარა

ცრუს განერიდე ქვეყნიურ ლტოლვას, დათრგუნე ჟამთა ხნის სარეცელი

გული სულს მიეც, სული ცის რბოლას, ცდუნებას კვერთხი, ბნელთ სალეწელი

ღვთისგულისათვის საწუთრო სძლიე, სულს მიაკუთნე დრო დარჩენილი

სიწმინდე შენი ხალხს შეაძლიე, მით წარსდექ ღმერთთან ზე აღდგენილი

სამომავალო სიცოცხლე შენი სიყვარულს მიეც სახიერების

გახსოვდეს–კეთილი არის მრჩენი, ბნელს გოდებს ხვედრი კადნიერების

მრწამსით მოსილი გზა ღმერთის ხვედრი, ადამიანო განვლე რჩეულად

ღმერთია ყველგან შენი შემხვედრი, ღმერთი შეგრაცხავს ცას შეღწეულად

სიყვარულისთვის ღვთისებრი ჯვარცმა, სულს აამაღლებს ღმერთის გულისთვის

ხსნა იცის ქვეყნად ცდუნების მარცხმა, ღმერთს განადიდებს გზანი სრულისთვის...

ავთანდილ ზერტელი