მართალია პირველად იყო მარგარიტა, მაგრამ მერე იყო პეპერონი. რომელ იტალოფილსაც ან პიცაჭამიასაც არ უნდა ჰკითხოთ, ყველა იზიარებს ამ თეორიას - ვეგანური პიცის მოყვარულების გარდა. პეპერონის მთელი ხიბლი ძეხვის და სოუსის სწორად შერჩევა-მომზადებას მოაქვს. ცხადია, თხელი, კნატუნა და ნოყიერი პიცის ცომიც არ უნდა დაგვავიწყდეს.

შემადგენლობა:

• პეპერონი (ძეხვი „სალიამი“) – 200 გრ.
• პომიდორი ჩერი - 100 გრ.
• ყველი - 200 გრ.
• წითელი ბულგარული წიწაკა - 1 ცალი
• პიცის სოუსი - გემოვნებით
• მწვანე ხახვი (გასაფორმებლად)

ცომისთვის:

• ფქვილი - 500 გრ.
• მარგარინი - 150 გრ.
• მაწონი - 250 მლ.
• სოდა - 1/2 ჩ.კ.
• მარილი - 1 მწიკვი

მომზადება:

      მოზილეთ ცომი: ხელით შეაზილეთ ერთმანეთს დარბილებული მარგარინი და ფქვილი. დაუმატეთ მაწონში გახსნილი სოდა და კარგად მოზილეთ (ცომი უნდა გამოვიდეს მაგარი).

      გააბრტყელეთ ცომი წრის ფორმაზე და დააწყეთ ინგრედიენტები შემდეგი თანმიმდევრობით: გახეხილი ყველი, პეპერონი, პომიდორი ჩერი, სიგრძეზე დაჭრილი ბულგარული წიწაკა და მოათავსეთ ღუმელში გამოსაცხობად.

      მზა პიცა გააფორმეთ წვრილად დაჭრილი მწვანე ხახვით.