ტკბილი ფლავს ყველა თავმომწონე თუ დამწყები დიასახლისი ამზადებს, მაგრამ ცოტამ თუ იცის რომ ტკბილი ფლავი ანანასში მოთავსებული განუმეორებლად გემრიელია...

         მითუმეტეს თუ ყველა იმ წესს ზედმიწევნით შეასრულებთ, რომელსაც QwellyNaRiA გთავაზობთ:

შემადგენლობა: 

ერთი ანანასის ამოსავსებად დაგვჭირდება:

• 200 გრამი ბრინჯი - მოხარშული;
• 2 ჩაის კოვზი თაფლი;
• 2 ჩაის კოვზი შაქარი (ეს გემოვნებით შეიძლება);
• 2 ჩაის კოვზი ქიშმიში;
• 2 ჩაის კოვზი დაჭრილი თხილი;
• 1-2 სუფრის კოვზი წვრილად დაჭრილი ანანასის შიგთავსი;
• 30-50 გრამი კარაქი ან ერბო;
• დამატებით გამომშრალი ხილი გემოვნებით.

მომზადება: 

1. ჭიქანახევარ წყალში მოხარშეთ ბრინჯი, ისე რომ კარგად შესქელდეს. 

2. ანანასს მოაჭერით თავი (ფოთლებიანი მხარე) ისე რომ გამოვიდეს მოჭრილი თავსახურად გამოდგეს. შემდეგ სპეციალური საჭრელით ან სხვა მარჯვე ხერხებით ამოჭერით შიგთავსი (გამოქუდნეთ, გამოშიგნეთ).

3. ამის შემდეგ სიროფი უნდა მოამზადოთ - თაფლი და შაქარი მოათავსეთ ჯამში და შედგით დაბალ ცეხლზე, ურიეთ და როცა შაქარი გაიხსნება - დაუმატეთ ხილი და თხილეული.

ახლა იწყება ამოვსების პროცესი.

4. ბრინჯი, კარაქი და მიღებული სიროფი აურიეთ ერთმანეთში ან შეგიძლიათ ფენა-ფენად ჩააწყეთ ანანასში - ბრინჯი და სიროფი, დროდადრო დაუფინეთ კარაქის თხელი ფენებიც.

5. ანანასის ამოვსებულ "სტომაქს" დაახურეთ ანანასისავე თავსახური, რომლის ფოთლებიანი ნაწილიც გახვეული იქნება ვერცხლის ქაღალდში - რომ არ დაიწვეს. ეს ყველაფერი მოათავსეთ პატარა ზომის ცეცხლგამძლე კონტეინერზე და შედგით გახურებულ ღუმელში 15-25 წუთი. თუ ანანასი იმდენად მაღალია, რომ თავისივე თავსახურით არ ეტევა ღუმელში, მაშინ "სტომაქს" გადააფარეთ ვერცხლის ქაღალდი, ან ანანასის ნაჭრები და ისე შედგით.

6. 15-20 წუთის შემდეგ თქვენ გელით ნამდვილი სიამოვნება...

თუ გნებავ ვინმეს გაუნაწილოთ, შეგიძლია ანანასი გადააწვინოთ და ყორიზონტალურად გაჭრათ, ეცადეთ შიგთავსი ძალიან არ მიმოფანტოთ...